א שמועס מיט קעלנער פה-סח II

מאכט אייך היימיש און באקוועם...
באניצער אוואטאר
געוואלדיג
חבר ותיק
חבר ותיק
הודעות: 3930
זיך רעגיסטרירט: מיטוואך דעצעמבער 10, 2014 4:15 pm
געפינט זיך: באתרא דנשקי שמיא וארעא להדדי
האט שוין געלייקט: 6926 מאל
האט שוין באקומען לייקס: 4626 מאל

א שמועס מיט קעלנער פה-סח II

שליחה דורך געוואלדיג »

א גוטן הרב קעלנער. ווי באקאנט האט איר לעצטנס רעזיגנירט פון אייער מנהלות אין "קאווע שטיבל", וואלט געווען פאסיג צו נוצן די געלעגנהייט צו כאפן מיט אייך א שמועס איבער קאווע שטיבל און אייער ראלע אין איר אויפבוי און הצלחה.
די דאזיגע "פה-סח" אויסגאבע וועט געלייענט ווערן דורך טויזנטער אידן, אויך אזעלכע וואס זענען נישט קיין רעגלמעסיגע ליינער פון קאווע שטיבל, אדער אפילו אזעלכע וועלכע האבן נאך קיינמאל נישט געהערט דערפון. אלזא זייט ביטע מסביר פאר די ליינער וואס קאווע שטיבל איז, און וואס איר ציל איז – פון אייער פערספעקטיוו.


א דאנק פאר'ן מיר געבן די געלעגנהייט צו רעדן צום עולם. קאווע שטיבל איז א פארום אויף דעם אינטערנעט וואו יעדער וואס קען ליינען און שרייבן אויף דער אידישער שפראך איז וועלקאם צו שרייבן זיינע מיינונגען ווילאנג זיי קומען נאך די פרינציפן פון יהדות. די חברי ההנהלה און גרינדער פון קאווע שטיבל זענען ביי דער מיינונג אז דער אינטערנעט איז א כלי מיט א געוואלד פון פאטענציאל צו ווערן אויסגענוצט צום גוטן. דער אינטערנעט איז גארנישט אנדערש ווי א מעסער, וואס קען גענוצט ווערן ווי א וואפן אומצוברענגען איינעם ח"ו, אדער – להבדיל – צו שניידן די חלה ביי א לעכטיגן שבת'דיגן טיש. יעדער אנשטענדיגער מענטש פארשטייט צו נוצן א מעסער נאר אויף א פאזיטיוון אופן, און איך גלייב אז רוב אנשטענדיגע מענטשן פארשטייען צו נוצן דעם אינטערנעט נאר אויף גוטע זאכן.

קאווע שטיבל איז דא אויסצונוצן דעם געוואלדיגן פאזיטיוון פאטענציאל פון דעם אינטערנעט צו ערמעגליכן אידיש-רעדענדע מענטשן פון איבער דער גארער וועלט זיך צונויפצושמועסן על דא ועל הא, און מיטטיילן איינער מיט'ן צווייטן אינפארמאציע אויף כל מיני נושאים. קאווע שטיבל איז א פלאץ וואו יעדער קען נעמען דעם פעדער אין דער האנט און שרייבן וואס אימער ער פילט אז עס קען אים בענעפיטירן מיט'ן שרייבן, און בענעפיטירן די ליינער מיט'ן ליינען.
גענוי דעם זעלבן בליק אויף דעם אינטערנעט האב איך געזעהן פון הג"ר יעקב יוסף ריינמאן שליט"א פון לעיקוואוד, מח"ס שופרא דשטרא. מיט בערך 14 יאר צוריק האט הרב ריינמאן ארויסגעגעבן א בוך "איין פאלק, צוויי וועלטן" צוזאמען מיט א רעפארם ראביי וואו זיי דעבאטירן זייערע השקפות. הרב ריינמאן האט געשריבן דעם בוך מיט די הדרכה פון הג"ר מתתיהו סאלאמאן שליט"א און הג"ר שמואל קאמינעצקי שליט"א. אין אן אינטערעסאנטן אויסטויש באשולדיגט דער רעפארם ראביי אז ארטאדאקסן זענען נישט זיכער מיט זייערע שיטות, און האבן מורא פון אינפארמאציע, און ער לייגט צו (זייט 33): "איך גלייב אז דאס איז די סיבה אז געוויסע חרדישע רבנים האבן לעצטענס גע'אסר'ט דעם באנוץ פון דעם אינטערנעט. יא, עס קען זיין אז זיי זענען באזארגט וועגן גרינגע צוטריט צו שמוץ, אבער איך מיין אז זייער עיקר פחד איז אז דער אינטערנעט איז דער 'הייוועי' צו וויסענשאפט. אומגעפילטערטע וויסענשאפט איז א סכנה פאר דעם פונדאמענטאליסטישן מהלך המחשבה."

הרב ריינמאן, אבער, ענטפערט אים אומצוויידייטיג אפ (זייט 46): "די פראבלעמען וואס אונזערע רבנים האבן מיט דעם אינטערנעט זענען שמוץ און 'אנליין רילעישאנשיפס' מיט פרעמדע; די גרינגע צוטריט צו כמעט גרעניצלאזע אינפארמאציע איז נאר א מעלה. איך האב דיר דאס געזאגט ווען מיר האבן זיך געטראפן די ערשטע מאל, אבער דו האסט עס שווער געקענט גלייבן. פונדעסטוועגן איז עס אמת."

[center]
Reinman.png
[/center]

שרייבן און אויסדרוקן א מיינונג איז א קונסט – דאס "רעדן" איז דאך וואס מאכט דעם מענטש פאר א מענטש, ווי דער תרגום זאגט אין פר' בראשית אז דער אויבערשטער האט געמאכט דעם מענטש פאר א מענטש דורכ'ן אים אריינגעבן א "רוח ממללא" – א גייסט פון רעדן. אין דעם זין איז יעדער מענטש אן ארטיסט. מיט'ן רעדן, און בפרט מיט'ן שרייבן, פראקטיצירט מען דעם קונסט פון קאמוניקאציע. שטעלט אייך פאר אז מ'גיט פאר א מאלער א שטיקל לייוונט צו מאלן דערויף, און מ'גיט אים דערמיט א טוץ באגרעניצונגען: זיבן אינטשעס פון אויבן, און פינף א האלב אינטשעס פון אונטן טארסטו נישט מאלן. זעקס אינטשעס אינדערמיט מוז זיין רויט, און פיר אינטשעס אויף דער רעכטער זייט מוז זיין ברוין, דא מוזטו מאכן א קעסטל און דארטן מוזטו מאכן א דריי-עק, וכו'. ווי קען דען א מאלער אויסגעבן זיין טאלאנט מיט אזעלכע באגרעניצונגען? כדי א מענטש זאל קענען רעדן און שרייבן, צו קענען דערפרידיגן זיין אינערליכן ארטיסט, דארף זיין א געוויסע פרייהייט, און געפיל פון רואיגקייט און גרעניצלאזיגקייט. און דערפאר איז אונזער גרעסטע עבודה אין קאווע שטיבל צו זיין נאמן לה' ולתורתו אבער אין די זעלבע צייט געבן פרייהייט און לופט פאר אחינו בני ישראל זיך צו לאזן הערן, און צו דינען ווי א פלאטפארמע צו נוצן און אויסשארפן די טאלאנטן. דערפאר האבן מיר א גאר מינימאלע צענזור, און ווילאנג מ'האלט זיך נישט צו שרייבן זאכן וואס גייען ארויס פון די אידישע ראמען קען מען האבן די פולע פרייהייט צו עקספלארירן זיך און די וויסנשאפט וואס מ'זאמעלט.

דער מאמר החכם זאגט, "וויסנשאפט איז מאכט." מיר גלייבן אז יעדער מענטש דארף האבן די מאכט אין די האנט צו קענען מאכן אייגענע באשלוסן באזירט אויף אמת'ע ידיעות. דער אינטערנעט האט געברענגט אן אויפוואכונג איבער דער גאנצער וועלט אז מענטשן זאלן קענען באשטימען זייער אייגענעם שיקזאל דורך אליין פארשן, ליינען, און קאמוניקירן מיט אנדערע.

גרופעס וועלכע שפירן אז אינפארמאציע וועט ברענגען אז אירע מעמבערס זאלן נישט בלינדערהייט נאכפאלגן די פירער, ווי טאטאליטארישע רעזשימען אין איראן און צפון-קארעא, האבן טאקע א פראבלעם מיט דעם אינטערנעט, וויבאלד די פירער ווייסן אז אינפארמאציע איז שעדליך פאר איר השקפה און קאנטראל. אבער דעמאקראטישע רעגירונגען און געזונטע געזעלשאפטן האבן נישט מורא אז אינפארמאציע אין די הענט פון אירע בירגער וועט זיין שעדליך.

מיר זענען דא ווי שטאלצע אידן אן קיין פחד פון אינפארמאציע. ניין, מיר זענען נישט דא צו געבן א פסק אז מ'זאל מעגן ארומוואנדערן אויפ'ן אינטערנעט צו ליינען פון אלעם. אויף דעם דארף יעדער פאר זיך מברר זיין די הלכה פון וואס מ'מעג יא ליינען און וואס נישט. אבער מיר זענען יא דא צו געבן א פלאטפארמע פאר יעדע לעגיטימע דעבאטע אינערהאלב אידישקייט און אונזער געזעלשאפט – דעבאטעס און שמועסן וואס קענען און דארפן געהעריג ווערן דורכגעטוהן אן קיין צענזור און אן קיין מוח-קאנטראל. איז די מערכה פון מאנכע רבנים און עסקנים קעגן די אינטערנעט בארעכטיגט? מעג מען געבן די האנט פאר א פרוי מפני דרכי שלום? איז אויסגעהאלטן נישט צו לאזן פרויען דרייוון? זענען אונזערע היסטאריע ביכער קראנט? קעגן מען גלייבן די חרדישע צייטונגען? וואס זענען די פרטים איבער די פילזייטיגע פערזענליכקייט פון הגראי"ה קוק? וואס זענען די אמת'ע סיבות פארוואס אזויפיל גייען אראפ פון אידישן דרך? מוזן מיר פארטיידיגן אונזערע מוסדות'ס ענגליש קאריקולום, אדער אפשר דארפן מיר זיך טאקע פארבעסערן? וואס זענען אלע הלכה'דיגע דעות וועגן מציצה בפה? קען עוואלוציע שטימען מיט אידישקייט? ווי אזוי האט זיך אנטוויקעלט די מנהג פון תגלחת נשים, און איז דאס מחייב? וואס איז דאס קבלה, און האבן אלע גדולי ישראל געהאלטן דערפון? האבן חרדישע אידן טאקע אייביג זיך צוריקגעהאלטן פון דרוקן בילדער פון פרויען אין אויסגאבעס און ביכער? איז דא א פלאץ פאר א חכם אין די חרדישע געזעלשאפט? וואו קען זיך ווענדן א יונגערמאן וואס ציט צו חכמה – וואס זאל ער לערנען, וואו זאל ער זיך דרייען? דארפן מיר זיך זארגן וועגן "חוקי תועבה"?

דאס, און טויזענטער אנדערע פראגעס, זענען לעגיטימע דעבאטעס וועלכע מעגן און דארפן אויסגעשמועסט ווערן. אויף די אלע פראגעס זענען פאראן אן א שיעור מיינונגען דורכאויס דעם ברייטן ספעקטרום פון ארטאדאקסישע אידן. יעדער מענטש האט רעכט צו זאגן א מיינונג אין די אלע דעבאטעס. עס איז נישט דא קיין שום סיבה אז אן אינטעליגענטער מענטש זאל פארמיטן ווערן פון ליינען און הערן וועגן די אלע זאכן, זיך באקענען מיט אלע מיינונגען וואס זענען דא צווישן פרומע אידן, און אויסשמועסן מיט אן אפענעם קאפ.

למעשה צו ענטפערן אייער פראגע בקיצור: דער ציל פון קאווע שטיבל איז צו נעמען 'אדווענטעדזש' פון דעם גוטן פאטענציאל פון דעם אינטערנעט, צו שאפן א פלאטפארמע פון אינפארמאציע, וואו יעדער איד קען שרייבן און ליינען אן שפירן אונטערדרוקט און באגרעניצט.

אקעי, כ'האב צופיל גע'דרשנ'ט. די ווייטערדיגע פראגעס האף איך צו ענטפערן בקיצור :)


ווען זענט איר אנגעקומען צו קאווע שטיבל אלס א מעמבער און אלס מנהל? האט איר זיך דורכגערעדט מיט א גוטן איד פאר'ן אננעמען אזא פאזיציע?

קאווע שטיבל האט זיך געגרינדעט אדר תשע"ב דורך פיר מענטשן, ואני בתוכם. פאר א לענגערע צייט האבן מיר גערעדט וועגן די וויכטיגקייט פון אזא פארום, ווי דאס וועט העלפן אחב"י און אויסנוצן דעם אינטערנעט לטובה. דורכאויס חודש שבט האבן מיר זיך שטארק אריינגעלייגט דערין, און לכבוד ר"ח שמרבין בו בשמחה האבן זיך די טויערן פון קאווע שטיבל געעפענט. אויב געדענק איך גוט האט מען די ערשטע פאר טעג נאר געקענט זיך איינשרייבן, און נאך עטליכע טעג האט מען געקענט אנפאנגען שרייבן.

מיר אליין זענען געווען סקעפטיש אויב דאס וועט זיך אויסארבייטן. אנדערע האבן דאס שוין פראבירט צו טוהן פאר אונז מיט ווייניג הצלחה. אבער מיר האבן גאנץ שנעל געזעהן אז מיר גייען אויפ'ן ריכטיגן וועג, און מיר האבן שנעל אנגעהויבן וואקסן.

די ערשטע צוויי יאר בין איך ווייניג געווען אינוואלווד אין די אויסערליכע חלק פון מנהלות. באריסטא האט שטארק געפירט די זאך, און די אנדערע מנהלים האבן גאר אסאך צוגעהאלפן. אויב די הנהלה האט אמאל עפעס געמוזט שרייבן, און נאר איך בין געווען עוועילעבל האב איך געבארגט די מנהל ניק פון איינער פון די מנהלים און געשריבן. איך האב אבער שוין דעמאלטס געשריבן מיט א ציווילן ניק. אין תשע"ד האב איך ערשט געעפענט דעם 'קעלנער' ניק, נאכדעם וואס באריסטא האט געדארפט האבן מער הילף, און צוביסלעך איז געפאלן אויף מיר דעם גורל צו פירן די גאנצע זאך.

איר פרעגט וועגן "פרעגן א גוטן איד." גראדע איז צווישן די אריגינעלע גרונדער געווען איין מנהל וואס פירט זיך דורכצורעדן זיינע גרעסערע באשלוסן מיט זיין מורה דרך, א מורה הוראה מובהק, און ער האט מיט אים דורכגעשמועסט דעם גאנצן פלאן פון קאווע שטיבל, דער ציל און ווי אזוי עס וועט געפירט ווערן. און דער מורה הוראה האט אים שטארק מחזק געווען מיט דעם פראיעקט. דער פאקט איז אז קאווע שטיבל איז דער איינציגסטער אידישער פארום וואס האט זיך געעפענט מיט א קלארן אוועקגעשטעלטן ציל, אויסגעהאלטן עפ"י תורה.

וואס איז געווען (און איז נאך) אייער וויזיע פאר קאווע שטיבל?

מיין וויזיע פאר קאווע שטיבל האב איך שוין אביסל אויסגעשמועסט אין מיין ערשטע ענטפער, און איך האף אז קאווע שטיבל וועט זיך ווייטער פירן אויף דעם וועג, צו געבן פאר אידן א פלאץ צו קענען האבן הרחבת הדעת, הרחבת השכל, אויסברייטערן די האריזאנטן פון דעם מח, און ברענגען פאזיטיווע ענערגיע אין דעם לעבן.

איך קוק ארויס אז קאווע שטיבל זאל זיך מער אויסברייטערן, מער אידן זאלן קומען ליינען, שרייבן און געניסן פון די געוואלדיגע אוצרות וואס זענען שוין פאראן, און ווערן צוגעלייגט יעדן איינציגן טאג. איך ווייס אז קאווע שטיבל האט שוין געברענגט פילע פאזיטיווע שינויים אין דעם לעבן פון אומצאליגע מענטשן, און איך בין איבערצייגט אז קאווע שטיבל האט שוין געברענגט פאזיטיווע שינויים בכלליות אין אונזער געזעלשאפט. מער ליינערס און מער שרייבערס וועט שטערקער מאכן דעם כח, און ברענגען נאך מער באוואוסטזיניגקייט צו די מיינונגען פון הונדערטער און טויזענטער אידן וועלכע ווערן נישט ערלויבט דערמאנט צו ווערן אין געדרוקטע אויסגאבעס אויב זיי זענען נישט באשטעטיגט דורך די וואס זענען אין פירערשאפט פאזיציעס. און דערפאר, אויב איר שפירט אז קאווע שטיבל איז פאסיג פאר אייערס א חבר אדער קרוב, שטופ אים צו כאפן א בליק און זיך אנצושליסן. ער וועט אייך דאנקבאר זיין.

וואס האט אייך געגעבן די שטופ צו אריין לייגן אזוי פיל שעה אין קאווע שטיבל?

דאס האט א שייכות מיט דעם פריערדיגן ענטפער. איך בין איבערצייגט אז מיר טוען א געוואלדיגע עבודת הקודש און א סערוויס פאר אחב"י. דער גרעסטער שטופ איז די אומצאליגע בריוון וואס איך האב כסדר באקומען אין אימעיל און אין 'אישי', פון מענטשן וואס האבן באדאנקט די הנהלה, און זיי האבן געשריבן – טייל מאל מיט אסאך דעטאלן – ווי קאווע שטיבל האט זיי ממש געטוישט דאס לעבן.

איך האב באקומען בריוון פון אידן וואס האבן געשריבן ווי קאווע שטיבל האט זיי געעפענט די אויגן צו קוקן אויף די וועלט מיט אן אנדערע פערספעקטיוו, געברענגט קשרים מיט חברים, אינספירירט צו מאכן פאזיטיווע שינויים אין לעבן, געהאלפן אנטוויקלען אפרישיעישן פאר חכמה, טאלאנט, ארויסגענומען פון דעפרעסיע און אייזאמקייט, אויפגעראכטן שלום בית, ועוד ועוד. דאס אלעס געט א געוואלדיגן חיזוק, און האט מיר געשטופט אנצוגיין דערמיט פאר די אלע יארן.

האט איר חרטה אויף עפעס וואס איר האט געטוהן אדער געשריבן אין לויף פון די יארן?

עס איז שווער צו האבן חרטה אויף געוויסע זאכן, ווייל עס איז לא ימלט נישט צו מאכן טעותים מיט'ן זיין בראש פון אזויפיל מענטשן פאר אזא לאנגע צייט. אויב וואלט איך נישט געמאכט דעם טעות וואלט איך גאנץ זיכער געמאכט אן אנדערן טעות... און אוודאי האב איך מחשבות אז איך האב געזאלט האנדלען אנדערש אין דעם פאל אדער אין יענעם פאל.

כ'קען יא זאגן אז כ'האב ערענסטע צווייפלען אויף צוויי פרטים פון מיין מנהלות צי זיי זענען געווען ריכטיג. 1) מיר האבן אוועקגעשטעלט קאווע שטיבל אז קיינער איז נישט מער פונעם צווייטן. יעדער האט פונקט די זעלבע רעכטן ווי דעם אנדערן. ס'זענען נישט דא קיין נייע און קיין אלטע ניקס, און אזוי אויך זענען נישט דא קיין ניקס וואס געניסן פון מנהלים פריווילעגיעס (איך אליין בין אין לויף פון די יארן עטליכע מאל געמעקט געווארן אויף מיין ציווילן ניק).

דער פאקט איז אבער אז למעשה זענען געוויסע שרייבערס יא מער פון אנדערע! א שרייבער וואס איז שוין דא מיט אונז א לאנגע צייט, און האט אסאך געשריבן, צוגעבענדיג בכמות ובאיכות, איז מער פון איינער וואס שרייבט נאר א תגובה'לע און און דארט. אין אונזער פארזוך צו זיין 100 פראצענט יושר'דיג און צו נוצן די זעלבע פרינציפן פאר יעדן בלי שום יוצא מן הכלל האבן מיר צומאל באליידיגט וועטעראן שרייבערס מיט'ן רעדאגירן, און זיי געמאכט פילן ווי מיר זענען נישט גענוג דאנקבאר פאר אלעס וואס זיי האבן צוגעגעבן צו קאווע שטיבל. פארשטייט זיך אז איינער טרעט גאר שטארק אויף אונזערע תקנות קען מען נישט מאכן קיין חילוקים. אבער אמאל איז דאס עפעס וואס איז נישט געפערליך, און הגם ס'איז קעגן די פרינציפן, קען מען עס פארקוקן. איך מיין אז אין אזא פאל מעג די הנהלה זאגן, "יא, יענער האט דאס און דאס געשריבן, עס איז אמת אז עס איז טעכניש נישט אויסגעהאלטן, אבער יענער איז א וועטעראן שרייבער וואס האט אזויפיל צוגעגעבן, דארף מען פארקוקן."

די צווייטע נקודה אויף וואס איך האב צווייפלען איז אז קאווע שטיבל איז לענ"ד צו דעמאקראטיש. און דאס איז בעצם די אנדערע זייט פון די זעלבע מטבע. איך האב נאכגעקוקט אסאך פארומס און גרופעס, און איך האב נאך נישט געטראפן אפילו איין פארום וואס האט אזויפיל קלארע פרינציפן וואס באגרעניצן די הנהלה. אין רוב גרופעס ענדיגן זיך די תקנות בערך אזוי: "דאס איז אונזער פארום, אין יעדן פאל וועלן מיר באשלוסן ווי אזוי מיר ווילן האנדלען. מיר פראבירן צו זיין יושר'דיג, אבער מיר קענען נישט מאכן קיין דין תורה אין יעדן פאל. אז עס געפעלט אייך נישט קענט איר גיין פון דא." א ריזיגע פראצענט פון די הנהלה'ס ענערגיע גייט אריין אין מסביר זיין און פארענטפערן יעדע באשלוס. דאס איז געווען א הויפט קוואל פון מיין ערשעפטקייט. כ'מיין אז מיר האבן שוין אמאל געשריבן אז ווען מ'קומט שרייבן אין א פארום דארף מען זיין גרייט צו ליידן אמאל פון א טעות מצד די הנהלה. אוודאי טארן טעותים נישט געשעהן אפט. אבער אויב די הנהלה איז מצליח צו געבן דעם געפיל אז מיר מיינען יעדנ'ס טובה – און איך מיין אז מיר האבן גאנץ גוט מצליח געווען מיט דעם, דארף מען זיין גרייט צו פארקוקן א טעות'ל דא און דארט.

איך זאג די צוויי נקודות שוין זייענדיג אינדרויסן פון די מנהלות, און איך זאג נישט ווי אזוי דער נייער מנהל ראשי, קאפיטאן יר"ה, און די אנדערע מנהלים זאל זיך פירן. איך לאז דאס גענצליך איבער פאר זייער שיקול הדעת.

האט איר א מעסעדזש וואס איר וואלט געוואלט איבערגעבן פאר די ליינער?

קאווע שטיבל האט געברענגט גאר אסאך קשרים אין ווירקליכן לעבן. גאר אסאך פון אונזערע מעמבערס האבן אין קאווע שטיבל געטראפן די וואס זענען היינט זייערע נאנטסטע חברים אין ווירקליכן לעבן. טייל מאל איז דער שטופ צו קומען צו קאווע שטיבל ווייל מ'האט נישט מיט וועמען צו פארברענגען און צו 'שעירן', און נאכדעם וואס קאווע שטיבל איז דער גוטער שליח צו ברענגען קשרים, שפירט מען אז מ'דארף שוין נישט צוקומען צו קאווע שטיבל.

איך פארשטיי דאס זייער גוט, און איך פארלאנג נישט פון קיינעם צו בלייבן אין קאווע שטיבל לעולמי עד. בפרט אז דאס לעבן טוישט זיך, און אז מ'האט אמאל געהאט צייט מוז נישט זיין אז מ'האט היינט צייט. איך וויל אבער בעטן די טייערע חברים, אויב קאווע שטיבל האט געשפילט א פאזיטיווע ראלע און אייער לעבן, אויב איר שפירט אז אונזער געזעלשאפט מיט קאווע שטיבל שטייט בעסער ווי אן קאווע שטיבל, פאל נאך אריין אמאל אמאל. פרעגט אייך אליין - אפילו אויב ק''ש איז שוין נישט געמאכט פאר אייך דירעקט, האט איר הנאה דערפון אומדירעקט? איז עס א פלאץ וואס איר ווילט אז עס זאל ווייטער אנגיין? איז עס א פלאץ וואס איר וואלט רעקאמענדירט צו א חבר וואס פרעגט וואו ער קען לייענען, שרייבן, און זיך באקענען מיט מענטשן וואס טראכטן און רעדן? אויב יא, געב א מאראלישן שטופ מיט'ן אריינווארפן א ווארט צוויי דא און דארט. ווייז אז הגם איר קענט שוין נישט זיין זייער אקטיוו, זענט איר נאך אלץ אין סאלידאריטעט מיט אונזער ציל צו זיין א פלאטפארמע פאר'ן פרייען ווארט. אפילו נאר איין מאל א וואך, אדער אפילו נאר איינמאל א חודש. אפילו נאר א שורה אדער צוויי, הראה לנו פניך המאירים.

איך וויל ענדיגן מיט א ברכה פאר דעם נייעם מנהל קאפיטאן אז ער זאל מצליח זיין מיט די עבודת הקודש, און קאווע שטיבל זאל נאך מער וואקסן בכמות ובאיכות אונטער זיין פירערשאפט. עס וועט מיר פרייען צו הערן אז דער נייער מנהל איז בעסער און מער ווירקזאם פון דעם אלטן, און א דאנק זיין פירערשאפט שטייגט קאווע שטיבל נאך מער ווי פריער. אזוי אויך ווינטש איך די אנדערע מנהלים און אחראים הצלחה רבה אין זייער ארבעט.

א פרייליכן פסח!
עס נעמט א מאנקי בערך 3 שעה צו טרענירן א מענטש אים צו געבן באנאנעס יעדע פאר מינוט...

-יין שרף-
באניצער אוואטאר
הוגה
שריפטשטעלער
שריפטשטעלער
הודעות: 3109
זיך רעגיסטרירט: דינסטאג אפריל 09, 2013 1:20 pm
געפינט זיך: מאנסי
האט שוין געלייקט: 7511 מאל
האט שוין באקומען לייקס: 6612 מאל

שליחה דורך הוגה »

כ'בין מעתיק מיין תגובה פון דא.

הוגה האט געשריבן:[justify]כ'האב מיך אוועקגעזעצט פאר עטליכע מינוט ליינען (אויף מיין פאון) און איך האב אנגעהויבן פון אונטען, די אינטערוויו מיט [tag]קעלנער[/tag]. איך האב קריטיקירט קעלנער ווען כ'האב געהאט קריטיק טאקע, מוז איך אים גראטולירן יעצט. אילו פינו מלא וכו' אין אנחנו מספיקים להודות. דיין קוראזש, פרעסיסטענס און טון למעשה איז א שטארקע אינספערעישאן. די זכות זאל ביישטיין אז דו זאלסט זעהן גוטע פירות פון דיין ארבייט.

כ"ד ידידך
הוגה


.[/justify]
"לא מצאנו בשום מקום בתורה שמצווה אדם להיות למדן ובקי בכל חדרי התורה. שכן תכלית הלימוד אינה להיות למדן אלא להיות אדם טוב, לעשות הטוב ולהטיב לזולתו." ~ רמ"מ מקאצק ז"ל
באניצער אוואטאר
ברסלבער
שריפטשטעלער
שריפטשטעלער
הודעות: 2048
זיך רעגיסטרירט: דינסטאג נאוועמבער 27, 2012 11:07 am
האט שוין געלייקט: 3940 מאל
האט שוין באקומען לייקס: 3589 מאל

שליחה דורך ברסלבער »

געוואלדיג האט געשריבן:איך פארשטיי דאס זייער גוט, און איך פארלאנג נישט פון קיינעם צו בלייבן אין קאווע שטיבל לעולמי עד. בפרט אז דאס לעבן טוישט זיך, און אז מ'האט אמאל געהאט צייט מוז נישט זיין אז מ'האט היינט צייט. איך וויל אבער בעטן די טייערע חברים, אויב קאווע שטיבל האט געשפילט א פאזיטיווע ראלע און אייער לעבן, אויב איר שפירט אז אונזער געזעלשאפט מיט קאווע שטיבל שטייט בעסער ווי אן קאווע שטיבל, פאל נאך אריין אמאל אמאל. פרעגט אייך אליין - אפילו אויב ק''ש איז שוין נישט געמאכט פאר אייך דירעקט, האט איר הנאה דערפון אומדירעקט? איז עס א פלאץ וואס איר ווילט אז עס זאל ווייטער אנגיין? איז עס א פלאץ וואס איר וואלט רעקאמענדירט צו א חבר וואס פרעגט וואו ער קען לייענען, שרייבן, און זיך באקענען מיט מענטשן וואס טראכטן און רעדן? אויב יא, געב א מאראלישן שטופ מיט'ן אריינווארפן א ווארט צוויי דא און דארט. ווייז אז הגם איר קענט שוין נישט זיין זייער אקטיוו, זענט איר נאך אלץ אין סאלידאריטעט מיט אונזער ציל צו זיין א פלאטפארמע פאר'ן פרייען ווארט. אפילו נאר איין מאל א וואך, אדער אפילו נאר איינמאל א חודש. אפילו נאר א שורה אדער צוויי, הראה לנו פניך המאירים.

איך האב דערווייל נאכנישט געהאט די צייט צו ליינען דעם "פסח סח וו", די איינציגסטע ארטיקל וואס כ'האב געליינט דערווייל איז געווען די שמועס מיט קעלנער, און דער ציטירטער פאראגראף האט מיך געברענגט צו שרייבן די שורות.
די וועלט זאגט אז שכחה איז א חסרון, און איך זאג אז עס איז א גרויסע מעלה. אזוי קען מען פארגעסן אלע צרות און פראבלעמען און אנהויבן יעדן טאג פון ניי. (רבי נחמן מברסלב)
כוכב
שריפטשטעלער
שריפטשטעלער
הודעות: 2595
זיך רעגיסטרירט: מוצ"ש דעצעמבער 07, 2013 6:35 pm
האט שוין געלייקט: 5213 מאל
האט שוין באקומען לייקס: 7045 מאל

שליחה דורך כוכב »

ברסלבער האט געשריבן: צו שרייבן די שורות.


איך זוך די שורות :?
באניצער אוואטאר
ברסלבער
שריפטשטעלער
שריפטשטעלער
הודעות: 2048
זיך רעגיסטרירט: דינסטאג נאוועמבער 27, 2012 11:07 am
האט שוין געלייקט: 3940 מאל
האט שוין באקומען לייקס: 3589 מאל

שליחה דורך ברסלבער »

:oops: :oops: :oops:
פארקלענער דיין בראוזער פענסטערל, און ס'וועט ווערן עטליכע שורות...
די וועלט זאגט אז שכחה איז א חסרון, און איך זאג אז עס איז א גרויסע מעלה. אזוי קען מען פארגעסן אלע צרות און פראבלעמען און אנהויבן יעדן טאג פון ניי. (רבי נחמן מברסלב)
באניצער אוואטאר
בן אדם
חבר ותיק
חבר ותיק
הודעות: 2959
זיך רעגיסטרירט: מיטוואך אפריל 01, 2015 12:02 am
געפינט זיך: At the gym
האט שוין געלייקט: 2852 מאל
האט שוין באקומען לייקס: 1373 מאל

שליחה דורך בן אדם »

איי איי קעלנער קעלנער, לא תתנשי מינן ולא נתנשי מינך.
באניצער אוואטאר
ליטוואק פון בודאפעסט
שריפטשטעלער
שריפטשטעלער
הודעות: 9686
זיך רעגיסטרירט: מיטוואך דעצעמבער 19, 2012 6:51 pm
האט שוין געלייקט: 3424 מאל
האט שוין באקומען לייקס: 9048 מאל

Re: א שמועס מיט קעלנער פה-סח II

שליחה דורך ליטוואק פון בודאפעסט »

איך האב אויך שטארק הנאה געהאט פון די קלארקייט פון אט די מאמר
איך האב געשיקט דאס פה סח צו הרב ריינמאן, וואס האט מיר אויסגעפרעגע וואס איז דאס. ער האט מיר געזאגט וועגען די ווערטער וואס מ'האט געברענגט פון איהם אז 'ס'איז נישט אזוי פשוט', וד"ל.
ועוד, ער האט אליינס געשריבען די ספר. הרב קמינצקי האט געגעבען א הסכמה און הרב סלומון איז זיינס א חבר, אבער קיינער טראגט נישט די אחריות אויפ'ן ספר אויסער איהם. סתם אזוי, איז ער אסאך גרעסערע פארנעם ווי הרב סלומון, א קלוגערע דענקער און א גרעסער תלמיד חכם. ער האט געשריבען א ספר אויף שטרות אלס יונגערמאן און ער האלט אין מיט'ן דרוקען אויף שיעבודים, עדות, חזקות און נאך

Sent from my HTC Desire 510 using Tapatalk
רעדאגירט געווארן צום לעצט דורך 1 אום ליטוואק פון בודאפעסט, רעדאגירט געווארן איין מאל בסך הכל.
The greatest obstacle to discovery is not ignorance--it is the illusion of knowledge.
(Daniel J. Boorstin) דא
באניצער אוואטאר
געוואלדיג
חבר ותיק
חבר ותיק
הודעות: 3930
זיך רעגיסטרירט: מיטוואך דעצעמבער 10, 2014 4:15 pm
געפינט זיך: באתרא דנשקי שמיא וארעא להדדי
האט שוין געלייקט: 6926 מאל
האט שוין באקומען לייקס: 4626 מאל

שליחה דורך געוואלדיג »

ליטוואק פון בודאפעסט האט געשריבן:ועוד, ער האט אליינס געשריבען די ספר. הרב קמינצקי האט געגעבען א הסכמה און הרב סלומון איז זיינס א חבר, אבער קיינער טראגט נישט די אחריות אויפ'ן ספר אויסער איהם.
Sent from my HTC Desire 510 using Tapatalk


נחמתני, ווייל איך האב נישט געהאט חשק צו ברענגען אין פה-סח פון א רעפארם ראביי.
עס נעמט א מאנקי בערך 3 שעה צו טרענירן א מענטש אים צו געבן באנאנעס יעדע פאר מינוט...

-יין שרף-
באניצער אוואטאר
ליטוואק פון בודאפעסט
שריפטשטעלער
שריפטשטעלער
הודעות: 9686
זיך רעגיסטרירט: מיטוואך דעצעמבער 19, 2012 6:51 pm
האט שוין געלייקט: 3424 מאל
האט שוין באקומען לייקס: 9048 מאל

שליחה דורך ליטוואק פון בודאפעסט »

ווער איז דער רעפארם ראביי? פארשטייט זיך עמיאל איז אויך א שותף אינ'ם בוך. נאר די מסכימים זענען נישט די שרייבער'ס און ער איז נישט אזא איינער וואס גייט פרעגען דעת תורה וויאזוי זיך צו ווינדלען
The greatest obstacle to discovery is not ignorance--it is the illusion of knowledge.
(Daniel J. Boorstin) דא
באניצער אוואטאר
mevakesh
ידיד ותיק
ידיד ותיק
הודעות: 993
זיך רעגיסטרירט: מיטוואך אוגוסט 12, 2015 12:11 pm
האט שוין געלייקט: 762 מאל
האט שוין באקומען לייקס: 882 מאל

Re: א שמועס מיט קעלנער פה-סח II

שליחה דורך mevakesh »

ליטוואק פון בודאפעסט האט געשריבן:איך האב אויך שטארק הנאה געהאט פון די קלארקייט פון אט די מאמר
איך האב געשיקט דאס פה סח צו הרב ריינמאן, וואס האט מיר אויסגעפרעגע וואס איז דאס. ער האט מיר מודה געווען אז ער האט געשריבען ליגענט אין זיין בוך און דער אמת איז ווי דער רעפארם ראביי האט געזאגט.

Sent from my HTC Desire 510 using Tapatalk

דאס איז א הארבע באשולדיגונג מצדך דו נעמסט פאראנטווארטליכקייט אויף דעם?
באניצער אוואטאר
ליטוואק פון בודאפעסט
שריפטשטעלער
שריפטשטעלער
הודעות: 9686
זיך רעגיסטרירט: מיטוואך דעצעמבער 19, 2012 6:51 pm
האט שוין געלייקט: 3424 מאל
האט שוין באקומען לייקס: 9048 מאל

שליחה דורך ליטוואק פון בודאפעסט »

איך האב איהם נישט געבעטן רשות דאס מפרסם צו זיין, אבער אזוי האט ער מיר געזאגט
The greatest obstacle to discovery is not ignorance--it is the illusion of knowledge.
(Daniel J. Boorstin) דא
רעאגיר