מאכען געלט אויף אלע צדדים

[ליטוואק פון בודאפעסט]

ווען די אמעריקאנער באפעלקערונג האט געהערט אז עס איז דא גאלד אין קאליפארניא, האט זיך אנגעהויבען א לויפעניש ווי צום לעצטען שטיקעל קישקע ביי א קידוש. מ׳האט אפגעלאזט קינד און קייט, גענומען שויפעלען אדער גאפלען, און געלאפען צו כאפען אביסל גאלד.

אבער די אידען זענען דאך קלוגער ווי יעדעם. מאנכע גוים גייען יא עפעס טרעפען, מאנכע נישט. דער אביסל מער און דער אביסל ווייניגער. וויאזוי מאכט מען געלט בכל אופן?

די אידען זענען אויך אהין געלאפען. זיי האבען געמאכט קראמען צו פארקויפען עסען און קליידער, שויפעלען און געצעלטען ווי צו שלאפען. א וועג וויאזוי צו שיקען די גאלד צוריק צום ישוב און פאסט קעסטלעך פאר די אלע וואלגערערס.

נישט יעדער וועט טרעפען גאלד, אבער יעדער וועט קויפען עסען.

היינט טוט זיך א לויפעניש אויף לאטטערי בילעטען. דער קלוגע איד דארף נישט קויפען אדער געווינען צו מאכען געלט. דו ווייסט וויפיל 7\11 מאכט אין די טעג? וויפיל קאווע און נאש, וויפיל צייטונגען און ציגארעטלעך זיי פארקויפען, ווען מענטשען קומען אריין פאר׳ן טיקעט און קויפען צו נאך חאזעריי?

זייט׳ס נישט קיין נערנים. לויף נישט ווי יעדער לויפט. פארקויף לויפען שיך פאר די לויפערס, און אזוי ביסטו שוין אנגעקומען.