פארוואס פייניגט מען אונזערע קינדער אין די ישיבות?

ארטיקלען און באטראכטונגען איבער דער חרדי'שער געזעלשאפט און קולטור
רעאגיר
לבי ובשרי
שריפטשטעלער
שריפטשטעלער
הודעות: 702
זיך רעגיסטרירט: זונטאג נאוועמבער 19, 2017 10:02 pm
האט שוין געלייקט: 458 מאל
האט שוין באקומען לייקס: 471 מאל

פארוואס פייניגט מען אונזערע קינדער אין די ישיבות?

שליחה דורך לבי ובשרי »

א ידיד האט מיר געשריבן:

"כ'האב געשיקט דעם פאלגנדן בריוו פאר ... זיי האבן מיר אלע געענטפערט אז איך בין גערעכט, אבער זיי קענען ליידער גארנישט טון דערוועגן.

"ס'איז א שאד אז דער בריוו זאל פארפאלן גיין נאר צווישן עטליכע מענטשן, איז זיי אזוי גוט, און זיי עס מפרסם. אפשר וועט עס אנקומען צו איינעם וואס קען יא עפעס טון, און אפשר וועט עס אויפוועקן דעת הקהל, און צוביסלעך וועט מען עפעס אויפטון.


לכבוד הרב...שליט"א.

פאלגנד איז מיין פראגע צו אייך, וואס כ'וואלט זייער געוואלט לייענען אן ענטפער, ווייל עס עגבערט מיר און לאזט מיר נישט קיין מנוחה.

אין די טעג זענען אלע בחורי חמד אין קעמפ וואו זיי שטייגן און לערנען ב"ה פלייסיג. איך וויל פארשטיין, וואס איז פשט אז די רגע וואס די קינדער ווערן 13, רייסט מען פון זיי אוועק יעדע הנאה גשמי וואס יעדער נארמאלער יוגנטליכער אין דער וועלט דארף האבן ווי לופט צו אטעמען. יא, לערנען תורה איז די וויכטיגסטע זאך – דאס איז דאך דער תכלית וואו מיר ווילן צוקומען. אבער איז נישט אונזער ערשטער פריאריטעט אז דער בחור זאל זיין געזונט פיזיש און גייסטיש אז ער זאל וואקסן לתפארת אלס א כלי וואס קען געזונטערהייט שטייגן בתורה ויר"ש? איז דא איין מענטש וואס קען אביסל דעם נפש פון א מענטש וואס קען זאגן מיט'ן פולסטן אחריות אז דאס איינשפארן א בחור אזויפיל שעות אין טאג אן געבן נארמאלע געשמאקע אקטיוויטעטן שאדט אים נישט ברוחניות ובגשמיות?

פארוואס זאל נישט זיין א פעסטער פראגראם פון הנאה וואס זאל לויפן אינאיינעם מיט די שעות הלימודים? פארוואס זאלן די בחורים נישט האבן א פראיעקט צו בויען עפעס, צוזאמענצושטעלן עפעס, מאכן א פלעי וכו' וכו' — קענען ליגן עטליכע שעה אין טאג אין עפעס אנדערש אויסער לימודים? און נישט סתם אבי יוצא צו זיין, נאר מיט'ן גאנצן אייפער און פלייסיגקייט מצד די ישיבה און די סטעף. (נישט סתם אז 'מ'לאזט' גיין שווימען א שעה, אדער אז 'מ'קען' גיין שפאצירן דריי-פערטל שעה.)

מיט דעם אויסרייד אז אויב ליגט א בחור אין עפעס אנדערש, וועט ער נישט קענען לערנען, זענען זיך די ראשי ישיבה מתיר ממש צו פייניגן די בחורים, אוועקנעמען זייער לופט צו אטעמען. און אייגנטליך, ווער האט אמאל חוקר געווען דעם ענין און באשטעטיגט אז ס'איז טאקע אזוי? מיידלעך לערנען פילע נושאים אין יהדות, באגלייט מיט שווערע לימודים פון לימודי חול, און קיינער זעט נישט אז זייערע עקסטרע-קוריקולער אקטיוויטעטן זאלן זיי שטערן. פארקערט, אזוי וואקסן זיי געזונט ברוחניות וגשמיות, און דווקא אזוי קענען זיי בעסער לערנען און שטייגן.

ווייל אמאל איז אפשר געווען א מעשה אז א אינגל איז געווען פאר'חלומ'ט ביים לערנען, און ער האט געזאגט אז ער טראכט פון דעם "אונטערן פלעי", האבן מיר אויף דעם געבויעט א גאנצע פילאזאפיע לויט וועלכער מ'רייסט קינדער און בחורים אוועק פון די פשוט'ע געברויכן וואס א קינד דארף האבן. ס'איז ליגנט אז א בחור וואס באקומט עטליכע שעה אין טאג געשמאקע אקטיוויטעטן וועט נישט קענען געהעריג לערנען. ס'איז א פרעכער שקר. מ'זעט דאס נישט אין דער ליטווישער וועלט וואו בחורים הארעווען אבער האבן אויך גשמיות'דיגע פראגראמען, מ'זעט דאס נישט – להבדיל – אין דער גויאישער וועלט וואו יוגנטליכע שטודירן שווערע סוגיות ווי דאקטאריי און קענען אויך צו דער זייט הנאה האבן ווי יעדער נפש דארף. מ'זעט דאס נישט ביי אונזערע טעכטער וואס נעמען שווערע טעסטס אויף כל מיני נושאים, בשעת זיי האבן אויך שעות פון אקטיוויטעטן.

און כ'בין שוין מיד פון די וואס נעמען נישט די נושא ערנסט, נאר וועלן אייביג פארטיידיגן דעם סטאטוסקווא מיט מאמרי חז"ל וואס זענען נישט נוגע צום ענין, ווי אז די תורה ווערט נאר נקנה במיעוט תענוג, וכו'. אט די מאמרי חז"ל זענען הוראות פאר עבודת ה', פאר איינער וואס באשליסט אז ער וויל שטייגן בתורה ויראת שמים, און גיט דערפאר אוועק זיין לעבן. כך היא דרכה של תורה, פת במלח תאכל ומים במשורה תשתה ועל הארץ תישן וחיי צער תחיה ובתורה אתה עמל – דאס איז נישט וואס א בחור'ל דארף טון אין ישיבה. אין ישיבה דארפן מיר זיכער מאכן אז דער בחור איז געזונט ברוחניות ובגשמיות, אזוי אז ווען ער ווערט ערוואקסן, און איז מחליט אז ער וויל שטייגן מיט מיעוט תענוג, זאל ער זיין א כלי הראוי לקבל. און מיר ווייסן זייער גוט אז ווייניגער פון 1 פראצענט ערוואקסענע נעמען אויף זיך די עבודת ה' פון מיעוט תענוג – איז ווי קענען מיר זאגן אז דאס איז די גאנצע פילאזאפיע אויף וואס מיר בויען אונזער חינוך פאר בחורימ'לעך?

דאס האט גארנישט צוטון מיט מצויינים, בינונים און חלשים. דער בחור מיט גאר גוטע כשרונות, פונקט ווי דער שוואכער, דארף זיין נפש זיך אויסגעבן אויף א נארמאלן לכתחילה'דיגן אופן, נישט סתם מיט עפעס א פארעווע פויזע.

וויל איך פארשטיין, וואס איז דער היתר אויף וואס מיר טוען מיט אונזערע בחורים? איז דאס אויסגעהאלטן עפ"י יהדות? עפ"י תורת הנפש? עפ"י מענטשליכקייט? איז דאס וואס מיר דארפן טון אז אונזערע בחורים זאלן בע"ה שטייגן בתורה ויראת שמים? איז דאס קראנט באשטעטיגט געווארן צו זיין דער איינציגסטער וועג וויאזוי בחורים קענען שטייגן?

דער אויסרייד אז "אייביג האט מען אזוי געטון" איז אויך א פוילער און לייכטזיניגער תירוץ. יעדער דור איז אנדערש, און מחנכים דארפן אייביג זען וואס איז גוט יעצט, און פאר אונזערע היינטיגע קינדער. וואס איז געווען אמאל וועט מען לאזן פאר היסטאריקער מסביר צו זיין. און כ'בין בכלל נישט זיכער אז אזוי איז געווען אמאל, ווייל אמאל איז דער טעגליכער סדר הלימודים געלאפן היבש קורצער ווי היינט.

אבער אפילו אויב מיר זאלן אננעמען אז דאס וואס מיר טוען מיט אונזערע בחורים האט א 'מסורה', האבן מיר דען נישט גענוג געטוישט פון דעם אמאל פאר אלע יארגענג, פאר קינדער, פאר ערוואקסענע, פאר מיידלעך און פאר אינגלעך? איז דען אמאל געווען אזא פארגעשריטענער און פראפעסיאנעלער סדר הלימודים ווי די קינדער האבן היינט אין חדר? האט מען דען אמאל זיך אזויפיל גערעכנט מיט דעם נפש פון א קינד אין חדר? האבן אונזערע זיידעס געהאט לוקסוריעזע מסיבות סיומי מסכתות אין פרעכטיגע האטעלן? זענען די אמאליגע מיידלעך געגאנגען אין שולע?

צומאל איז עס אן ענין וואס דער היינטיגער דור פארלאנגט עפעס אנדערש ווי דאס וואס דער עבר האט פארלאנגט, און אמאל איז עס א התעוררות וואס דער אויבערשטער שיקט צו אז מיר טוען טאקע בעסער ווי אמאל, ווי די היינטיגע מצות וואס זענען פיל בעסער פון די אמאליגע, און אזוי אויך פילע הידורים צו וועלכע מיר זענען היינט זוכה אין יעדן תחום. אזוי צי אזוי, דארפן מיר קוקן אויף אונזערע קינדער היינט, און אויף אן אמת, מיט אן ערנסטקייט, זיך באטראכטן צי וואס מיר טוען איז ריכטיג, און פארבעסערן.

עס איז צייט אז מיר זאלן איינזען אז וואס מיר טוען היינט בשנת תשע"ט מיט אונזערע קינדער צווישן די יארגענג פון 13 ביז די 18 איז א פארברעכן, און מיר דארפן זיך רעכנען מיט די יסודות'דיגע נפשיות'דיגע צרכים וואס 99 פראצענט בחורים – פון מצויינים ביז חלשים – דארפן האבן פאר זייער גייסטישן און פיזישן געזונט.

איך קוק ארויס אויף אייער ענטפער,

מוקירכם,....
איסתרא בלגינא קיש קיש קריא

דער אשכול פארמאגט 10 תגובות

איר דארפט זיין א רעגיסטרירטער מעמבער און איינגעשריבן צו זען די תגובות.


רעגיסטרירן איינשרייבן
 
רעאגיר