די רשעות פון די היינטיגע מוסדות!!

[פינזען האלץ]

די רשעות פון נישט אנעמען קינדער אין די מוסדות איז א רשעות וואס עטס פארשטייסט נישט ווי ווייט די רשעות גייט, און ווי ווייט דאס מאכט חרוב כלל ישראל

איך רעד יעצט אפילו נישט פון קיין פריוואטע מוסדות וואס קען מיט רשעות זאגן דעם אויסגעזויגטן תירוץ גיי צו א צווייטע מוסד ווייל וואס האסטו מיט מיר...
איך רעד דא פין קהילה׳ישע מוסדות ווי למשל סאטמאר, וויזניץ , באבוב, ועוד...

מיט וואספארא רעכט ווען למשל סאטמאר נישט אנעמען די קינדער פון א אינגערמאן וואס האט אלע זיינע יארן געלערענט אין סאטמאר? ווייל ער איז א שוואכע אינגערמאן? ענק האבן געהאט צוואנציג יאר איהם צו מחנך זיין אויב ענקער חינוך סיסטעם ארבייט נישט דארפען יעצט נישט זיינע קינדער גיין אין פאבליק סקול!!!



און ס׳איז שוין נישט קיין סוד אז אינז לעבען היינט אין א שווערע וועלט פיל מיט נסיונות וואס אמאל איז נישט געוועהן, אזוי ווי די אמאליגע צדיקים פלעגן זאגן אויף אינזער דור אז בעקבתא דמשיחא וועט מען זיך דארפען דראפן אויף די גראדע ווענט זיך צו האלטן ביים אמונה...

אידישקייט איז גענוג שווער אזוי אויך, עס איט איס... פיל מיט נסיונות... פארוואס מאכט מען עס נאך שווערער??

פארוואס נעמט די מוסדות א אינגערמאן
וואס לייגט תפילין יעדן טאג, דאווענט 3 מאל א טאג, זאגט שמע ישראל ה אלקינו ה אחד, און מען נעמט נישט אריין זיינע קינדער אין מוסדות וועגן ער גייט מיט א פאלא-שירט (קארצע ערמעל) אדער ווייל ער גייט מיט באקעל שיך?!?!?

עטס זענטס נארמאלע מענטשען? פאלא שירט? וואס איז שלעכט מיט קארצע ערמעל???? אידישקייט איז איהם שוין גענוג שווער מיט אלע טעגליכע נסיונות פארוואס מאכטס עטס איהם עס נאך שווערער מיט זאכן וואס האט גארנישט מיט אידישקייט אדער הלכה???


און נאכדעם קימט מען אין ביהמ״ד נאך געלט פאר נחמת ישראל און פאר חסד לאברהם... מען איז ביזי מאכן קירוב רחוקים. זאגשע נאר וואס טוט זיך מיט די אייגענע מענטשען??? הייבטס אן צו טיען קירוב קרובים פאר מען טוט קירוב רחוקים!!!!!
אבער וואס טוט מען אנשטאטס מקרב זיין די אייגענע מענטשען? מען ווארפט אוועק די אייגענע מענטשען?!!?!?!

און מען רעדט נישט דא פין אינגעלייט אפיקורסים מען רעדט פין פשוטע אינגעלייט וואס פאר מאיזה סיבה שהוא זענען זיי אביסל שוואכער ווי די סטענדערד אינגערמאן... וועגן דעם טארן זייערע קינדער נישט האבן קיין מוסד????

און נאך דעם ווינדערט מען זיך פארוואס די אפיקורסישע גרופע ״פוט-סטעפס״ האט שוין ליידער היינט צוטאגס איבער טויזענט מעמבערס!!!
ווייל אז מען ווארפט זיך מיט די אייגענע מענטשען, מען ווארפט בוחרים פין ישיבות, מען ווארפט קינדער פין מוסדות קיקט עס אזוי אויס!!!!!!
הערטס אויף צו אוועקווארפען ענקערע אייגענע מענטשען!!! די אלטע סאטמאר רבי ר׳ יואל זי״ע וואלט דאס קיינמאל נישט געטיען אין ער האט דאס קיינמאל נישט געטיען!!!!
פינקט פארקערט ער האט מקריב געוועהן זיינע מענטשען נישט מרחק געוועהן זיינע אייגענע מענטשען!! און אפילו א נישט זיינס א מענטש פלעגט ער מקריב זיין אפילו אידן ציונים ווען ער האט זיך געטראפן מיט זיי פריוואט האט ער זיי מקריב געוועהן און געגעבן געלט אויב ס׳איז געוועהן פאר א צדקה צוועק.


ס׳איז באקאנט א מעשה פון ר׳ נתן יוסף ז״ל די מנהל פין די סאטמאר ישיבה אין סענסטריט, איז ער אריינגעגאנגען צום סאטמאר רבי׳ן ז״ל זיך באקלאגען אויף א בחור וואס דרייט זיך ליידיג ער דאווענט נישט ער לערענט נישט און ער וויל איהם ארויסווארפען פין ישיבה
האט די רבי באפוילען אריינצוריפען דעם בחור. איז די בחור אריינגעקימען צום רבי׳ן פרעגט איהם די רבי ס׳איז אמת וואס ר׳ נתן יוסף זאגט אויף דיר אז די דאווענטסט נישט די לערענסט נישט?
האט די בחור א שאקל געגעבן מיטן קאפ אין געזאגט אז יא... האט זיך די רבי זי״ע אויסגעדרייט צו ר׳ נתן יוסף אין געזאגט... א בחור וואס זאגט נישט קיין ליגענט ווארפט מען נישט ארויס פון מיין ישיבה!!!

לענייננו די סאטמאר רבי ז״ל האט געוויסט און פארשטאנען די הארבקייט פין ארויסווארפען א בחור פין ישיבה אין די חורבנות וואס דאס טוט ברענגען. און ס׳איז ידוע אז ער פלעגט קיינמאל נישט ארויסווארפען א בחור פין ישיבה חוץ א בחור וואס האט ממש פארדארבען אנדערע בחורים אבער אויסערדעם האט ער קיינמאל נישט ארויסגעווארפען קיין בחורים אין אוודאי אין אוודאי נישט קיין קינדער ילדים שלא טעמו טעם חטא!!


וועלן מאנכע פרובירן צו פארענפערן די הנהלי המוסדות און זאגן אז יעדע מוסד וויל האלטן זייער מוסד פאר א געוויסע קרייז אין אויב איינער אין נישט פינקטלעך ווי די קרייז וואס די הנהלה האט אפגעמאכט זיי זיכען, זענען זיי נישט מחיוב אנצונעמען די קינדער פין די שוואכערע שטיבער

איז אזוי די קהילה׳שע מוסדות קענען ניטאמאל זאגן דעם תירוץ פאר צוויי סיבות.

1)
ס׳איז נישט דיין פריווייטע מוסד און אז מען האט נישט אזוי געטיען 25 יאר צוריק ווען ענקער רבי האט דאס געגרינדערט טו עס יעצט אויך נישט

2)
קינדער בדרך כלל פארדארבען נישט אנדערע קינדער עס איז כמעט א מילתא דלא שכיחא (איך רעד פין פארדארבן. נישט ווי די עקסטרעמע משגאים וועלן זאגן אז ווען א קינד רעד אין חדר פין למשל Uncle Moishy האט ער פארדארבן אנדערע קינדער) אין ווי לאנג זיי פארדארבן נישט קיינעם האסטו נישט קיין רעכט צו שיקן יענע קינד אין תהום אריין


יעצט פאר די פרייוואטע מוסדות, און ישיבות אויך, וועל איך זאגן אזוי... מיט וואספארא רעכט קימסטו אין די וועהלסט זיך?
אז די האסט נישט קיין פלאץ נעם אן דער וואס האט זיך איינגעשריבן ערשט!!!
און אז די ווילסט זיך וועהלן ווייל די ווילסט האבן א מוסד אדער א ישיבה מיט א גיטע נאמען דאס איז נישט קיין תירוץ זיך צו ווארפען מיט אידישע נפשות!!
און אז די עפענסט א מוסד פאר ביזנעס אדער א ישיבה פאר כבוד און די טוסט עס נישט לשם שמים אויפצוטיען פאר אידישקייט אין מיט דעם מאכסטו חרוב דורות מיט דעם מאכסטו חרוב אידישקייט עפען נישט קיין ישיבה עפען נישט קיין מוסד גיי ווער א פלאמער!

ברענג נישט אריין א קאמפעטישען אין די מוסד ליין אז יעדער זאל זיך אנהייבן צו וועהלן אין אזוי חרוב מאכן אידישקייט!! טו דיך אן א בלויע העמעד אין דרייוו א גארביטש טראק אין מאך נישט חרוב אידישע דורות !!!

מען קען נישט אנקיקען א מוסד פון א ביזנעס פערספעקטיוו אין אויף דעם בויען תירוצים אויף אלע רשעות וואס מען טוט, ווייל קען זיין אז ביי א דין תורה וואלט מען געפסקנט אז א מוסד איז נישט מחיוב אנצונעמען קינדער ווען מען קיקט עס ווען אן פון א דיני ממונות פערספעקטיוו ... אבער ס׳איז נישט קיין שום ספוק אז כלפי שמים איז עס נישט אויסגעהאלטן, אין אך אין וויי פאר דער וואס וועט ענפערען אויף יענע וועלט אזעלעכע תירוצים... איך בין יענעם נישט מקנא...


און פאר די אלע טאטעס וואס שרייען איך וויל מיינע קינדער זאלן נאר לערנען מיט קינדער וואס זייערע טאטעס טיען נאר אזוי אין אזוי וכו׳ וכו׳...
וויל איך זאגן אז כלל ישראל איז איין משפחה אין אז ער איז גרייט צו נעמען אויף זיינע פלייצעס די חורבנות וואס דאס מאכט מיט אנדערע קינדער וואס האבן נישט קיין מוסד, מיז ער האבן גרויסע פלייצעס ווייל ס׳איז נישט קיין שום ספוק אז אזא סעלפיש טאטע לייגט זיך אוועק א גיטע באקוועמע ספאט אין גהינום

ווייל ס׳איז נישט אז די ביסט משלח קינדער וואס וועלן פאטענטשעלי פארדארבען דיינע קינדער, נאר די ביסט משלח קינדער ווייל זייער טאטע איז נישט פינקטלעך אזוי פרום ווי דיר. אין די ווילסט זיי שיקען אין תהום אריין??? האלסט טאקע אז דאס איז די רצון השם???

און איך וועל ענק זאגן נאך מער געווענדליך ווען מען נעמט נישט אן א קינד אין א מוסד ווערט אן אנגעצויגענעם מצב אין שטיב און רוב מאל וועט דאס אפילו צוברענגען צו שלום בית פראבלעמען, און צפעציעל ווען א מוסד באשילדיגט איינער פין די עלטערען דירעקט אז ער, אדער זי, איז די סיבה פארוואס מען נעמט נישט אן די קינד, וועט דאס ברענגען צו אן אגענצויגנקייט אין שטיב אין רוב פעלער צו שלם בית פראבלעמען...

איז די תורה האט געלאזט אויסמעקן דעם אייבערשטען׳ס נאמען פאר שלום בית... קימען ענק אין ענק מאכן חרוב שלום בית מיטן נאמען פין די תורה מיטן נאמען פינם אייבערשטען ר״ל!!



אין רבותי די געפיל פון ווערן אפגעזאגט אין זיין ריזשעקטעט איז א מורא׳דיגע שלעכטע געפיל איז דאס קען לאזן זייער א שלעכטע רושם אויף אינגעלייט, מאמע׳ס, בחורים, קינדער, אדער מיידלעך פאר היי סקול...
מען ווארפט זיך אזוי מיט מענטשען מען זאגט אפ דעם מען זאגט אפ יענעם... וואספארא אפעקט וואספארא רושם מיינט עטס דאס לאט איבער אויף מענטשען??
וויאזוי וויל מען אז די מענטשען זאלן האבן א געפיל פאר אידישקייט ווען מען ווייזט זיי אז אידישקייט האט נישט קיין געפיל פאר זיי?!?!?




וועלן פארשטייט זיך יעצט מענטשען קימען זאגען וואס קען מען טיען עס וועט זיך ממילא נישט טוישען וויאזוי זאגט מען אויף אינגליש ״יאא קענט טשעינזש סיטי האל״... מען קען גארנישט טיען...

וויל איך זיי זאגן אז ווען די מוסדות באקימען ווען נישט די שטיצע פין אזוי סאך עלטערען וואלטן זיי נישט געקענט אנגיין מיט די רשעות

יעצט רבותי לאטס ענק הערן...! ווער עס האלט אז ס׳איז אן עוולה וואס די מוסדות טוט... לאטס הערן ענקער שטימע!

און צו דעם עושר:
פאר די געסט דיין ברייט-הארציגע נדבה פאר א מוסד געב זיי א פרעג צו זיי ווארפען זיך ארום מיט אידישע נפשות... פאר די געסט א ברייטע נדבה פאר א ישיבה געב זיי א פרעג צו זיי זאגן אפ בחורים אין מאכן חרוב אידיש דורות!

רבותי! אז מען האט די צייט צו מאכן פראטעסטען קעגען די ציונים... און אז מען האט די צייט אין די געלט צו מאכן א כינוס כלל ישראל וועגן דעם אינטערנעט... טרעפטס אויך צייט צו טיען עפעס וועגן די חורבן איום ונורא פון זיך ארום ווארפען מיט קינדער בחורים און מיידלעך!!