"אובער" איז א קאר סערוויס וואס ווערט באשטעלט דורך אן עפפ. ווען מען גייט ארויף אויף דעם עפפ, זעט מען גלייך אלע קארס וואס זענען אין געגנט, און ווי ווייט זיי זענען. מען קען אויך אויפ'ן פלאץ באקומען אן אפשאצונג וויפיל די נסיעה גייט קאסטן צו דעם ארט וואו מ'וויל גיין. ווען מען באשטעלט א קאר, באקומט מען באלד די אינפארמאציע פון דעם דרייווער, אריינגערעכנט א בילד אז מ'זאל אים גרינג קענען אידענטיפיצירן.
אובער האט עטליכע סארט קארס, און די פרייזן זענען געוואנדן אויף דעם קוואליטעט. דער פרייז ווערט גערעכנט אויף אן ענליכן פארמאט ווי די טעקסיס, אבער היבש טייערער. ביי דער ענדע פון דער רייזע ווערט דאס רייזע-געלט אויטאמאטיש גערעכנט אויף דעם קאסטומערס קרעדיט קארד.
לעצטנס האט אובער באקומען פאנדינג וואס האט אפגעשאצט די פירמע אויף איבער 18 ביליאן דאלאר!
*
"ליפט" ארבעט אויף אן אנדערן מהלך. דער יסוד פון "ליפט" איז צו טיילן נסיעות מיט אנדערע. אז איר פארט סיי ווי ערגעץ, פארוואס נישט נעמען איינעם מיט אייך, און יענער וועט אייך נאך באצאלן דערפאר? לויט דער פירמע איז א רייזע מיט ליפט מיט בערך 30% ביליגער ווי מיט א טעקסי.