"מיט אסאך יארן צוריק האט דער פעטער ז"ל מחייב געווען יעדן צו געבן הונדערט דאלאר פאר די מוסדות. דאס איז געווען בימיו, לויט די היינטיגע סכומים איז דאס אריבער טויזנט דאלאר, דאס איז לכה"פ וואס יעדער דארף געבן לטובת המוסדות."
נו, אז דער רבי איז מחייב אז יעדער "דארף" געבן לכה"פ טויזנט דאלאר, ווייסט ער מסתמא וואס ער רעדט. איך בין דאך אבער א נייגעריגער, און כ'וויל נאכקוקן פון וואס מ'רעדט דא. אינעם קאלום "סאטמארער רבי אין אמעריקע" אין "די צייטונג", ווערט צוגעברענגט פון סענדער דייטש אין זיין בוך "שנת החמישים", איבער דער גענעראל פארזאמלונג וואס איז פארגעקומען זונטאג פר' ויצא תשכ"ג, וואו דער רבי האט מחייב געווען אז יעדער זאל זיך ביישטייערן מיט מינימום $100.
נו, אז מיר ווייסן אז מ'רעדט דא פון תשכ"ג, קען מען זיך באנוצן מיט פארשידענע אינפלאציע קאלקולעיטארס וואס זענען פאראן אויף דעם וועב, און דער חשבון קומט אויס אז די דעמאלטדיגע 100 דאלאר איז יעצט ווערד ערגעץ צווישן 810 און 830 דאלאר.
באמערקט אז כ'ווייס נישט ווען דער רבי האט געגעבן זיין אינפלאציע-אפשאצונג -- אז ס'ווערט ציטירט ביי א דינער היי-יאר, האט ער עס שוין מסתמא געזאגט א יאר צוריק, ווען ס'איז אפשר ווערד געווען נאך ווייניגער.
אלנפאלס, איז אינטערעסאנט צו וויסן מיט וואספארא אינפלאציע-קאלקולעיטער דער סאטמארער רבי האט זיך באנוצט, מיט וועלכן ער איז צוגעקומען צו א חשבון אז 100 דאלאר אין תשכ"ג איז ווערד מער פון טויזנט דאלאר אין תשע"ט, וואס מיט דעם חשבון האט ער מחייב געווען זיינע חסידים צו געבן אט דעם סכום פאר זיינע מוסדות.
