וויאזוי מאכט מען א פיינע געשמאקע קאווע? ארטיקל

ארטיקלען, אנאליזן, מיינונגען, געדאנקען, און שמועסן
רעאגיר
באניצער אוואטאר
DotCom
ידיד ותיק
ידיד ותיק
הודעות: 631
זיך רעגיסטרירט: דאנערשטאג מערץ 01, 2012 10:51 pm
געפינט זיך: בין פיתום לרעמסס
האט שוין געלייקט: 324 מאל
האט שוין באקומען לייקס: 591 מאל

וויאזוי מאכט מען א פיינע געשמאקע קאווע? ארטיקל

שליחה דורך DotCom »

בס"ד

פי.די.עף. צום פרינטן - צוגעלייגט בילדער

דא אין קאווע שטיבל דרייען זיך ווי פארשטענדליך אסאך קאווע ליבהאבער'ס ווי די נעמען זייערע זאגן עדות, באריסטא, דזשאווא, סטארבאקס, און נאך אסאך, איז אוודאי דא פאסיג אויסצושמועסן אלע אינטערסאנטע פאקטן ארום דעם בארימטן קאווע געטראנק און דערגיין וויאזוי מען קען אליין מאכן א פיינעם נארהאפטיגן קאווע ביי זיך אינדערהיים, אפיס אדער ווי אימער מ'זאל נאר זיין.

באמת, איז קאווע אסאך מער א חכמה ווי א מלאכה, די מענטשן וואס באקומען דעם געפיל צו קאווע וועלן מיט דער צייט דעוועלאפן אן ארטיסטישן געפיל צום קאווע גענוי ווי מיט אלע אנדערע ארט'ס, זייער אסאך האלטן אז קאווע איז פונקט אזא ארט ווי וויין און אנדערע רייכע געטראנקען וואס מען דארף פארשטיין דערצו און מען דארף האבן דעם געפיל דערצו אויף צו קענען ארויסנעמען דעם ריכטיגן טעם, במשך די יארן ובפרט אין די לעצטע יאר הונדערט האבן זיך שוין טויזענטער מענטשן אריינגעלייגט אינעם קאווע סוגיא, הונדערטער מאשינען זענען ארויסגעקומען, אומצאליגער שטודיעס און סטאטיסטיקס אדורכגעפירט געווארן, ביליאנען דאלארן איז שוין געספענדעט געווארן, אלעס נאר פאר איין ציל: וויאזוי ארויסצונעמען דעם מאקסימום טעם פונעם גרינעם קאווע באנדל! מיט דער צייט האבן זיך אסאך מענטשן געטראפן אלס קאווע פארשטייער און געעפנט קאווע געשעפטן, טייל דערפון זענען זיך זאגאר צו-וואקסן צו ריזיגע קייט געשעפן און אויסגעשפרייט איבער די גאנצע וועלט, ווי אסאך פון אונז זענען שטענדיגע קאסטומער'ס.

ווייניג ווייסן אבער אז אליינס צו מאכן אינדערהיים א פראפעסיאנאלע קאווע איז נישט אזוי שווער, אדרבה מיט דער צייט ווערט עס גאר א האבי, אלזא לאמיר גיין צושטייטעלעך און קלאר צונעמען דעם נאטורליכן לעבנ'ס שטייגער פונעם באנדל, פונעם בוים ביזן גלעזל, און זעהן וויאזוי איעדער מענטש קען מיט פשוט'ע ידיעות און קנאפע ביליגע כלים ארויסנעמען דערפון די מאקסימום און מאכן א פיינעם קאווע מיט א ריח גן עדן און קאסטעמייזד פלעיוואר לויט די אייגן געשמאק, ממש אזוי ווי אין א סטארבאקס אדער נאך בעסער.

(אויפקלערונג: דער ארטיקל רעדט נישט פון אינסטענט קאווע ווי טעיסטערס טשויס, כאטש אז עס פארמאגט טאקע די 'קאפעין' סובסטאנץ וואס דערפרישט דעם מענטש, האט עס אבער נישט די עכטע קאווע טעם, אונזער ארטיקל רעדט אויסשליסליך נאר פונעם רייכן געשמאקן קאווע טעם ווי איר וועט ליינען שפעטער)

וואס איז דאס קאווע?
דער קאווע באנדל וואקסט אויף א בוים עס וואקסט אין רויטע בערי'ס, איעדער בערי האט 2 קערנדלעך וואס אט די קערנדלעך זענען אונזערע קאווע בונדלעך. זיי וואקסן מערסטענס אין די טראפישע לענדער ווי אפריקע, סאוט אמעריקע און סאוט אזיע, דאהי אין די יונייטעד סטעיטס וואקסן זיי נאר אין האוואי און אין פארטא ריקא.

טיף אינעווייניג אין איטליכער קאווע באנדל ליגט צווישן אנדערע באהאלטן א געוויסע אויל, גערופן 'קאפעאהל’ (Caffeol), וואס דער דאזיגער אויל דארף מען ערשט אנטוויקלען, דערנאך איזאלירן פון די נישט גוטע אוילן, און דערנאך ווען מען לייגט עס אריין אין הייס וואסער ווערט דערפון דעם בארימטע קאווע געטראנק.

דער ריכטיגער טעם פונעם קאווע איז ביטער אבער ענטהאלט א גאר רייכן אייגנארטיגן טעם און גערוך (Aroma) וואס שווימט גראד אריין טיף אינעם מענטשנ'ס אינערליכע פארגעניגן נערוו אויף א אפעטיטליכן פארנעם, דער 'קאפעין' סובסטענס וואס דער קאווע ענטהאלט איז א עקסטערע באנוס פונעם קאווע באנדל איר טבע איז אויפצופרישן און סטימולירן דעם מענטשן'ס בלוט און מח און פארשטייט זיך דעם געמוט, דער קאווע געטראנק לאזט איבער א געשמאקער נאכ-טעם און א השפעה אינעם בלוט סיסטעם פאר א לאנגע צייט. מה רבו מעשיך ד'!

אבער אדם לעמל יולד, אזוי ווי מיט א יעדער אנדערע גוטע זאך אין די וועלט ברויך מען זיך אויף דעם אויך פלאגן, כדי צו טועם זיין דעם ריכטיגן טעם מוז מען ארויפשארן דעם ארבל אביסעלע, אדער אויסליידיגן דעם טאש.

די ארבעט פון אויסארבעטן דעם קאווע איז א צווייפאכיגע, קודם דארף מען אוועקנעמען די שלעכטע אוילן פונעם באנדעל און דערנאך פראדוצירן דעם גוטן אויל, און די פראסעס וויאזוי מען טוט סוקסעספול אויסארבעטן דעם באנדל באשטייט פון פיר שטאפלען ווי פאלגענד:

1. אויסארבעטן: אפטיילן דעם באנדל פונעם בערי און טרוקענען.
2. ראוסטן: אפבאקן דעם באנדל.
3. מאלן: צומאלן דעם באנדל אויף שטויב.
4. בראטן: אפ-בראטן דעם שטויב אין הייס וואסער.

קוקט אויס גאנץ גרינג, אבער באמת איז דא הונדערטער וועגן און מיטלען וויאזוי צו טהון די יעדע פון די פיר סטעפ'ס, און יעדער מיטל (מעטאד – Method) האט צענדליגער פרטים ופרטי פרטים וואס יעדער פרט פאר זיך וועט אויסמאכן א חילוק אינעם ענדגילטיגן טעם. נישט אלע פרטים איז וויכטיג צו וויסן בכדי צו מאכן א גוטן קאווע, און נישט אלעס קען מען בכלל באשרייבן אויפאיינמאל, אבער איך וועל פרובירן אראפצושרייבן די סאמע וויכטיגסטע פרטים וואס איז נוגע פאר יעדן, וואס אויב דעס ווערט פארנאכלעסיגט איז עס יצא שכרו בהפסדו, א שאד געווען די צייט אין די געלט.

סטעפ 1) אויסארבעטן Processing-
די ערשטע סטעפ פון אויסקלויבן, אפטיילן און טרוקענען, איז אונז נישט קיין סאך נוגע למעשה ווייל ווי געזאגט איז אונזער ציל מיטן ארטיקל נאר אויף וויאזוי צו מאכן אליינס דעם קאווע, און רובא דרובא פראססעסינג ווערן געטהון אין די פעקטארי'ס (אחוץ האבי'איסטן און טייל מחמירים פסח) און אויך ווייל ווילאנג דער באנדל איז נאך גרין און נישט אפגעבאקן וועט זיך עס האלטן פריש פאר זייער א לאנגע צייט אזויפיל ווי 2 יאר, די עיקר ארבעט אונזערע פאנגט זיך אן בשעת און נאכן באקן, ס'איז אבער יא כדאי צו וויסן פון וועלכן משפחה די באנדל קומט, געוויסע טייפ באנדלעך רעקאמענדן די קאמפעני'ס נאר געוויסע בראטן מיטלען, ווי שפעטער ערקלערט.

סטעפ 2) באקן – ראוסטן – Roasting
ווי פריער ערווענט, דער באנדל רויערהייט פארמאגט פארשידענע אוילן און מינעראלן, זיסע און ביטערע און רוב פון זיי זענען אומב'טעמ'ט פארן מענטשליך מויל, דער געשמאקער 'קאפעאהל' אויל וואס איז רעספאנסעבעל פאר'ן געשמאקן קאווע פלעיוואר ווערט נאר פראדוצירט און אנטוויקעלט דערנאך וואס דער באנדל ווערט אפגעבאקן אויף א דעגרי פון בערך 250 סעלציוס פאר בערך 15-20 מינוט, בשעת'ן ראוסטן וועלן די אלע אנדערע נישט גוטע אוילן און מינעראלן צוביסלעך פארשוואונדן ווערן, טאקע נישט אינגאנצן אבער ווי לענגער און הייסער אלס מער פון די נישט גוטע גייט אוועק, ביים ראוסטן דארף מען שטארק אובאכט געבן נישט איבערצוגיין, אויב ראוסט מען אביסל שטערקער ווי מען ברויך וועט די גוטע אויל אויך פארשוואונדן ווערן, און איבערבלייבן וועט מען מיט א ברוינעם באנדל ענליך צו קאווע.

ראוסטן איז א גאר וויכטיגע פעולה וואס האט א דירעקטן השפעה אויפן טעם, אלע פאקטארן וואס נעמען אנטייל אינעם ראוסטן האבן א חלק אינעם טעם, דער ראוסטער מאשין, די היץ פונעם מאשין, ווילאנג מען ראוסט עס, און וויבאלד יעדעס מין באנדל פארלאנגט זיך אן אייגענער וועג פון ראוסטן געוואנדן אין וועלכע לאנד דאס באנדל איז געוואקסן, און וועלכער זומען-קערנדלעך האבן עס ארויסגעגעבן, דעריבער האט שוין יעדער קאווע מאניופעקטשערער זייער אייגענע אויסגעארבעטער פראפיילס וויאזוי זיי טוען עס ראוסטן.

פאר'ן מענטש בלייבט בלויז איבער אויס צו וועלן צווישן לייכט – מיטל – שטארק, געוויסע קאווע קאמפעניס רופן עס אן מיט צונעמען, 'פרענטש ראוסט' וואס רעפערירט צו זייער שטארק, 'איטאליאן ראוסט' - שטארק, 'אמעריקען-ברעקפעסט ראוסט' - נארמאל, 'האלב סיטי ראוסט' - לייכט, און נאך פארשידענע צונעמען וואס יעדער נאמען איז געראוסטעד אויף אן אנדער וועג און שטאפל, נישט קיין חילוק וואס דער נאמען איז וועט אבער געווענליך שטיין קלאר ארויסגעשריבן אלע אינפארמאציע, דער חילוק צווישן די אלע איז בעיקר אין טעם, דער כלל איז ווי ליכטיגער געראוסטעד אלס מער פון די אריגינעלע אוילן (און קאפעין בתוכם) זענען נאך פארבליבן דעריבער איז עס מער ביטערער, און ווי טונקעלער געראוסטעד אלס זיסליכער און גערייכערטער די פלעיוואר'ס, אלס מער און שטערקער די קאווע טעם.

בלענדעט ראוסט: איז די פראסעס פון אויסמישן עטליכע מין באנדלעך וואס זענען פארשידנארטיג אין טעם די קאווע קאמפעני'ס טוען דאס כדי צו פארגרעסערן זייער אויסוואל, אסאך מבינים זענען אבער היפש סקעפטיש מיט דעם וועג, און זיי וועלן ליבערשט זיך האלטן צו איין מין ראוסט.

פלעיווארד ראוסט: סייענטיסטן האבן היינטיגע צייטן אויסגעטראפן א וועג וויאזוי אריינצושפריצן אינעם קאווע באנדל בעפאר'ן ראוסטן סינטעטיש-קאנצענטרירטע אוילן פון פארשידענע פלעיוואר'ס ווי למשל ווענילע, טשאקלאד, הייזעלניס, א.א.וו. וואס מיט'ן פראסעס פון ראוסטן ווערט זייער פלעיוואר אויך ארויסגעברענגט צו א מאקסימום שטאפל, אזוי געבנדיג א דאפלטן טעם אינעם קאווע גלעזל, די ווארט 'פלעיוואר' אויפן קאווע פעקל קען מיינען ביידע, געדענקט נישט ווערן צומישט מיט די אריגינעלע נאטורליכע קאווע פלעיוואר'ס, מ'דארף אלעמאל קוקן ווי דער חמור שטייט איין, אמאל מיינט 'פלעיוואר' די אריגינעלע פלעיוואר'ס, און אמאל סינטעטישע, די נעמען זענען אנדערש און מיט דער צייט וועט מען זיך צוגעוואינען וואס מיינט וואס, אויך דארף מען קוקן אויפ'ן הכשר סימבאל, נישט אלע פלעיווארד באנדלעך זענען כשר.

קאווע פאקט: די קאווע פלעיוואר וועט אנפאנגען אויסוועפן פון די באנדלעך בערך 2 וואכן נאכדעם וואס עס איז געווארן אפגעבאקן! אפילו ווען דער באנדל איז נאך גאנץ און האלט פאר'ן צומאלן ווערן! דעריבער וועלן די מבינים אייביג זוכן צו האבן ווי מער פריש, און פריש מיינט נישט פון ווען מ'האט עס אפגעשניטן פון בוים נאר פון ווען מ'האט עס אפגעבאקן, רוב געפעקלטע קאווע באנדלעך – אפילו ווען עס איז נאך גאנץ- וואס ווערן פארקויפט אין די גראסעריס זענען שוין געווארן אפגעבאקן צווישן א האלב יאר און א יאר בעפאר אויב נישט מער, כדי צו זיין מער זיכער אז די קאווע איז פריש אפגעבאקן דארף מען קויפן נאר אין קאווע געשעפטן ווי למשל סטארבאקס, דאנקין דאנאטס, און פרעגן דעם דארטיגן באריסטא (קאווע מבין אויף איטאליעניש) ווען עס איז געווארן געראוסטעד, טייל געשעפטן לייגן אפן אויס די אינפארמאציע, געווענליך לייגן זיי עס אויפן טעוועלע אונטערן רעגיסטער.

נאך אן עצה איז צו קויפן אנליין, ס'דא וועבסייטס וואס גאראנטירן אז זיי ראוסטן דעם טאג וואס עס ווערט ארויסגעשיקט. דער אנליין מיטל איז היינט זייער אויפגעכאפט און איז אגב זייער טראסטבאר צווישן די מבינים. איין באקאנטע סייט איז http://www.sweetmarias.com זיי טשארדזשען נישט פאר שיפינג.

אויך איז דא צו קויפן האום-ראוסטער'ס, מינים ממינים שונים, טייערע און ביליגע, וואס ערמעגליכט דעם מענטש אליינס צו ראוסטן אינדערהיים, אזוי קען מען האבן פריש אפגעבאקענע קאווע ווען מ'וויל, און מ'שפארט זיך געלט, איך וואלט עס אבער נישט רעקאמענדעט פאר יעדן ווייל ווי געשמועסט איז ראוסטן א חכמה פאר זיך, א נישט גיטע ראוסטינג קען אוועק'הרג'ענען די אויל שוין גלייך ביים אנפאנג, דערצו דארף מען א גיטער מאשין וואס געווענליך קאסט אסאך (פליז נישט קיין ביליגע קוואליטי), און אוודאי פארנעמט עס אסאך צייט, אבער אסאך קאווע ליבהאבער'ס ראוסטן יא אליינס, טייל טוען עס פאר א האבי און טייל פאר פרישקייט און אייגענע געפילן. אויב וויל איינער יא אליינס ראוסטן איז דא א ברייטן אויסוואהל פון גוטע ראוסטערס אנליין.

אויך זענען דא וואס ראוסטן אין אלטערנאטיווע מיטלען אינדערהיים ווי אין אויל פענדלעך, אויווענעס, מייקראעיוו, טעפ, וואס פארשטייט זיך אז דאס איז היפש איינגעשטעלט פאר בעגינער'ס.

אין קורצן: אויב קויפט מען די באנדלעך געראוסטעד דארף מען גוט קוקן אויף 3 זאכן. 1) די דאטום ווען עס איז געראוסטעד געווארן. 2) וועלכע שטאפל עס איז געראוסטעד געווארן 3) און אויב עס איז סינטעטיש פלעיווארד און מיט וואס, די לעצטע צוויי ווענדט זיך אלעמאל אינעם טעיסט פונעם מענטש און צומאל קען געדויערן יארן פון עקספערימענטן צו געוואר ווערן דעם בעסטן טעם לויטן אייגענעם געשמאק, טעמו וראו.

נאכ'ן ראוסטן אדער קויפן דארף מען זייער אויפפאסן אפצוהיטן די פרישקייט, קאווע איז זייער סענסעטיוו און פארלירט זייער שנעל דעם טעם אויב טוט מען עס נישט גוט האלטן, לופט איז די גרעסטע שונא פאר קאווע, נאכדעם קומט פייכטקייט, ליכטיגקייט, און היץ, די בעסטע איז אריינצולייגן די באנדלעך אין א קאנטעינער וואס מ'קען שטארק צושליסן און אוועקלייגן אין א טרוקענער טונקעלער קעבינעט אוועק פון די געז רענטש אדער אויוון, ס'דא וואס זאגן אז צו האלטן אין פריזער איז גוט, ס'איז א גרויסער מחלוקת המבינים, אבער רוב פון זיי זענען מודה אז אויב גייט עס אריין און ארויס אפטער איז נישט גוט, ווייל ביים ארויסנעמען פון א קאלטע צו א ווארעמערע פלאץ ווערט א פייכטקייט ארום דעם באנדל וואס ווערט דערנאך איינגעזאפט אינעם באנדל און פארטרייבט דעם רייכן טעם און אראמא.

איינמאל מיר האבן זיך שוין איינגעהאנדלט א גוטן קאווע באנדל דארף מען עס גיין צומאלן.

סטעפ 3) מאלן – Grinding.
דער אויל איז שוין אנטוויקעלט אבער נאכנישט גרייט ארויסצוקומען, אויב וועט מען עס יעצט אריינלייגן אין הייס וואסער וועט גאר ווייניג פלעיוואר ארויסקומען, וועגן דעם פעלט זיך אויס צו צומאלן קודם, בשעת'ן מאלן ווערט די אויל אפגעבינדן פונעם באנדל און ווערט גרייט אפ-געבראטן צו ווערן. מאלן האט זיך זיינע אייגענע געזעצן, אסאך מענטשן שאצן אונטער די כח פון מאלן אבער באמת איז מאלן פונקט אזא וויכטיגע פאקטאר ווי אלע אנדערע פעולות און האט פונקט אזא שטארקע השפעה אינעם טעם שפעטער.

כדי ארויסצוברענגען די מאקסימום פלעיוואר פונעם באנדל איז וויכטיג עס זאל זיין געמאלן לויט די וועג וואס דער בראט מעטאד גייט זיין, ווי עס וועט שפעטער ערקלערט ווערן איז דא פארשידענע מעטאדן פון בראטן, לענגערע און קערצערע, מעטאדן וואס פארלאנגען די קאווע צו בלייבן אין בארירונג לענגער מיט די הייס וואסער ביים בראטן הייסט א לאנגער בראט, און דעמאלט דארף די באנדלעך זיין געמאלן אויף א גרעסערע מאס שטויב (coarse), אויב איז עס א קערצערע צייט אין בארירונג מיט די הייס וואסער איז עס א שנעלער בראט מעטאד און עס וועט מוזן זיין מער דינליכער געמאלן (fine), באנדלעך וואס איז דינליך געמאלן און מען בראט עס דערנאך מיט א לאנגער מעטאד וועלן צופיל פון די איבעריגע אוילן ארויסקומען און עס וועט באקומען א איבערגעטריבענע ביטערליך טעם, אזוי אויך פארקערט, שטויב געמאלן מער דיקליך און געבראטן מיט א שנעלערע מעטאד וועט זיין א ליכטיגער קאווע אהן קיין סאך טעם.

א וויכטיגע זאך איז אז אלע שטויב זאלן זיין געמאלן אייניג אין סייז, אויב נישט וועט זיין שווער אויסצורעכענען די ריכטיגע מאס קאווע שטויב וויפיל מען ברויך אריין לייגן אין די הייס וואסער, דעריבער איז שטארק נישט רעקאמענדעט צו מאלן מיט א קאך בלענדער אדער סיי וועלכע מיל וואס איז נישט געמאכט קאסטום פאר קאווע באנוץ.

מאלן איז דירעקט יא א זאך וואס זייער אסאך מענטשן טוען אינדערהיים צוליב וואס עס איז נישט טייער, מען קען קויפן גאנץ גוטע עלעקטריק מילן פאר אונטער 20$, אויך איז דאס מאלן בכלל נישט שווער רוב מילעכלעך האבן נישט מער ווי 3 שטאפלען גרויס- מיטל- קליין, און די כללים וויאזוי צו מאלן איז גרינג צו געדענקן, גרויס פאר לאנג, דין פאר קורץ און מיטל פאר מיטל, און לאמיר נישט פארגעסן די עיקר סיבה פארוואס מ'מאלט עס אינדערהיים איז פאר די פרישקייט וואס ווי שוין געשמועסט איז פרישקייט פאר קאווע לעבנסוויכטיג, און איינמאל עס איז צומאלן וועט עס אנפאנגען צו וועפן אזוי שנעל ווי 20 מינוט דערויף!

בעפאר'ן מאלן דארף מען זיכער מאכן אז די מילעכעל איז זויבער און עס איז נישט איבערגעבליבן קיין אויסגעוועפטער שטויב פון א פריערדיגע מאל, איר ווילט נישט אז די ביסל שטויב זאל אפ'הרג'נען דעם גוטן קאווע.

סטעפ 4) בראטן – Brewing
ווען די באנדל איז שוין גוט צוריבן און צומאלן איז עס שוין רייף פאר'ן בראטן, די בראטן וועט ענדליך איינקעשן די שווערע ארבעט פון ביז אהער, נאך וואס די קאווע שטויב וועט קומען אין בארירונג מיט בריעדיג הייס וואסער וועט די קאווע פלעיוואר ענדליך ארויסגיין פונעם באנדל און אריינגיין אין די וואסער און אזוי ארום אונז ערמעגליכן עס אויסצוטרינקן מיט א טיפע אפעטיט.

ביז פאר אכציג יאר צוריק בערך איז נאר געווען איין בראטן מעטאד, דאס איז געווען אז מען האט ארויפגעגאסן די הייס וואסער דירעקט אויפן שטויב און געווארט אפאר מינוט און דערנאך אויסגעטרינקן, די 'זאמטיגע קאווע' ווי מ'רופט עס היינט האט געהאט 2 חסרונות איינס אז דער מענטש האט אייביג געדארפט אויפפאסן אז שווימעדיגע שטויב זאלן זיך נישט אריינגעליטשן אין זיין מויל און צווייטענס האט דער וועג נישט אלעמאל געקענט אינגאנצן ארויסנעמען אלע אראמא אויל, היינט צו טאג'ס זענען אבער פארהאן הונדערטער מעטאדן, יעדעס מעטאד האט זיך זיינע מעלות, אבער נאר איינצעלנע מעטאדן זענען געווארן אויפגעכאפט איבער די גאנצע וועלט, הויפזעכטליך צוליב די מאקסימום מאס פלעיוואר וואס די מעטאדן ברענגען ארויס, די מעטאדן זענען בעיקר די פאלגענדע דריי.

1. די דריפ ברעיו מעטאד– Drip brew
2. די עספרעססא מעטאד Espresso -
3. די פרענטש פרעס מעטאד – French press

1. דריפ ברעיו Drip Brew
דער דריפ ברעיו מעטאד איז די מערסט אויפגעכאפטע מעטאד דא אין אמעריקע צוליב די גרינגקייט דערפון, עס ארבעט זייער פשוט, מ'לייגט אריין די שטויב אין א פאפיר פילטער אדער בלעכן פילטער (ס'דא וואס טענה'ן אז די פאפיר פילטער זאפט איין אביסל פון די פלעיוואר'ס), די פילטער לייגט מען דערנאך אריין אין מאשין, די וואסער קאכט זיך אפ אינעם מאשין ביז צו א דעגרי פון 205-195 פארנהייט און דערנאך טראפט עס אריין אינעם פילטער ווי עס טוט אפ-בראטן די קאווע שטויב פאר ווילאנג עס מאכט דורך דעם וועג אראפ ביז צום גלעזל, דערנאך ווען אלעס איז ארויסגערינען דערזעהט מען זיך מיט א פיינער פרישער קאווע.

דער דריפ ברעיו הייסט א מיטל וועג (Meduim), נישט שנעל און נישט לאנג, ממילא דארפן די באנדלעך זיין מיטל געמאלן. אויך וועט די קאווע טעם נישט זיין אזוי אגרעסיוו ווי מיט עספרעססא וואס איז א שנעלער וועג.
פאר די וואס גלייכן נישט צו נוצן א מאשין איז אויך זייער גרינג צו נוצן דעם מעטאד, מ'קויפט א דריפ גלעזל וואס איז אויסגעפארמט ווי אן אייסקריעם קאון, מ'קאכט אויף דאס וואסער ביז 200 דעגרי (טערמא מעסטערס איז דא צו קויפן פאר אונטער 3 דאלער אין וואלמארט) מען לייגט אריין א פילטער אינעם קאון, מען לייגט אריין די קאווע, מען לייגט אונטער א גלעזל, און מ'גיסט צושטייטעלעך אריין די וואסער.

דער דריפ ברעיו מעטאד איז זייער א גרינגע און אויב מען מאכט עס לויט די פארשריפטן וועט ארויסקומען א גאר פיינער קאווע, די פראבלעם איז אבער אז רוב דריפ מאשינען וואס מ'קען קויפן אין די דעפארטמענט סטאר'ס בראטן נישט ביי א דעגרי פון די פארלאנגטע 195-205 פארנהייט, דאס איז א שטיקל פארפירערישקייט פון די קאמפעני'ס, ס'אבער דא איינצעלנע מאשינען וואס קאכן יא אויף דאס וואסער צו די פערפעקט דעגרי ווי למשל פון די קאמפעני http://bona-vita.biz/products.asp אדער דא וואס קאסט שוין אביסל מער http://www.bodum.com/us/en-us/shop/detail/11001-01US/ ס'איז אויך דער מאדעל Cuisinart DCC-1200 פונעם בילד אויבן, קען מען טרעפן פאר אונטער 80$ און די טעסטס ווייזן אז עס קומט אויך אן ביז צו די פארלאנגטע 195 דעגרי.

דער נארמאלער מאס קאווע צו נוצן מיט דעם מעטאד איז 2 קליינע לעפלעך געמאלענע קאווע פאר יעדע זעקס אונסעס, נארמאל שטייט אויפ'ן בעג פונקטליך וואס די קאווע מאנויופעקטשורער רעקאמענדירט, יעדנ'ס טעיסט איז אבער אנדערש.

מיט סיי וועלכע מעטאד, איז זייער רעקאמענדירט צו נוצן געפילטערטע וואסער, די טעם איז אינגאנצן אנדערש ווען מ'נוצט געפילטערטע וואסער, דיסטילד וואסער איז קיינמאל נישט רעקאמענדירט.
קאווע איז געמאכט צו טרינקן גלייך נאכן בראטן, יעדער מינוט וואס עס שטייט נאכן בראטן אפילו עס זיצט אויפן ווארעמער ווערט פארלוירן נאך און נאך פון די פלעיוואר, גראסעריס און רעסטאוראנטן וואס בראטן אין גרויסע קוואנטומען ווערן רעקאמענדירט ביי די קאמפעני'ס צו נוצן צוגעמאכטע קאנטשאוס וואס לאזט נישט צו קיין לופט.

2. עספרעססא Espresso
דער עספרעססא מעטאד איז דער שנעלער מעטאד און בראט אפ די קאווע מיט פרעשור, מען קאכט אויף דאס וואסער ביז צו א דעגרי פון 195-205 דעגרי, מען לייגט אריין דין געמאלן קאווע שטויב אינעם פעקל, און דער מאשין שטופט די הייס וואסער מיט א שטארקע כח אדורך די קאווע ביז צו גלעזל. די פרעשור מאכט אז א שיכט שוים זאל ארויפשווימען אויבן, קאווע ליבהאבער'ס גלייכן שטארק דעם שוים צוליב די קאווע פלעיוואר וואס עס פארמאגט.

ביי דעם עספרעססא מעטאד קומען די קאווע פלעיוואר'ס ארויס מער קאנצענטרירט ווי ביי אנדערע מעטאדן און דער קאווע פלעיוואר שפירט זיך היפש מער אגרעסיוו אקעגן די דריפ מעטאד.

אמאל איז נאר געווען צו באקומען די עספרעססא געטראנק אין קאפע געשעפטן ווייל די כלים זענען געווען זייער גרויס און האבן געקאסט אסאך, און אויך האט מען געדארפט ביי דעם אסאך מער עקספיריענס ווי געווענליכער קאווע, ממילא ווען מ'האט גערעדט פון ארויסגיין פאר אן עספרעססא האט דאס אויטאמטיש געמיינט א סאציאלע באגעגענישט ערגעץ אין א קאפע הויז און דארט איז געווען אזא מומחה וואס מען האט גערופן א 'באריסטא' א שטייגער ווי דער מאשקע אין א קרעטשמע און מ'האט געשמאק פארברענגט די צייט, היינט איז שוין דא גוטע עספרעססא מאשינען פאר מענטשן אינדערהיים, אויך איז שוין דא צו באקומען פערטיגע דין געמאלענע קאווע מיט אלע מינע פלעיוואר'ס ווי למשל די באקאנטע keurig k-cup, אבער אין אלגעמיין איז נאכאלס א קאפע הויז א פלאץ פאר עספרעססא בעת קאווע מאכט מען איבעראל.

מיט דער צייט האבן קאווע מומחים איבער די וועלט פרובירט צו פארבעסערן דעם עספרעססא געטראנק און פארשידענע געטראנקן זענען דורך דעם געבוירן געווארן, אריינגערעכנט די ברייט באקאנטע קאפפיטשינא, וואס לייגט עספרעססא קאווע אונטן, הייסע מילך געווארעמט אינעם עספרעססא לייגט מען די צווייטע העלפט, דערנאך קומט א שוים וואס ענטהאלט שוין פארשידענע פלעיוואר'ס ווי ווענילע אדער צימערונג א.ד.ג., אין טייל בעסערע רעסטאוראנטן טוען זיי אריינמאלן זייער לאגא אדער פערזענליכע מעסידזשעס אינעם שוים.

3. די פרענטש פרעס מעטאד – French press
די פרענטש פרעס מעטאד איז פון די עלטסטע מעטאד'ן וואס מבאנוצט זיך נאך ביז היינט, מערסטענ'ס ווערן זיי באנוצט דורך קאווע ליבהאבער'ס ווייל עס געט די מאקסימום קאנטראל פארן מענטש במשך דעם גאנצן בראטן פראצעדור, סיי די וואסער - גראד, און סיי ווילאנג ס'זאל געדויערן און וויפיל מ'זאל אריינלייגן, דער קאנטראל לאזט דעם מענטש עקפערימענטן פארשידענע וועגן, דעריבער איז עס נאכאלס אזוי באליבט אפילו עס איז נישט פון די גרינגסטע מעטאדן.

די מעטאד ארבעט דורך אריינלייגן אין אזא באטל אדער גלעזל די רויע קאווע שטויב, מ'קאכט אויף דאס וואסער ביז 195-205 דעגרי, מ'גיסט ארויף דאס וואסער איבער'ן שטויב, מען שאקעלט עס אויף אביסל, און מ'לאזט עס דארט אפ-בראטן פאר אפאר מינוט געוואנדן לויטן מענטש און לויטן באנדל און לויטן ראוסט שטאפל, אבער דורכשניטליך לאזט מען עס דארט 4-5 מינוט, דערנאך נעמט מען דעם צוגעפאסטן פלאנדזשער וואס האט א פלאכן ברייטן פילטער פון אונטן, מקוועטשט אראפ די קאווע ביז אונטן, עס קומט אויס אז אלע שטויב בלייבט שטעקן אונטער'ן פלאנדזשער, דערנאך גיסט מען אריין די זויבערע קאווע אין א גלעזל.

וויבאלד דער קאווע בלייבט א לענגערע צייט מיט די הייס וואסער דארפן די באנדלעך זיין געמאלן אויף א דיקליכן פארמאט, אזוי אויך וועלן יעצט ארויסקומען אסאך מער פלעיוואר'ס ווי מיט די אנדערע מעטאדן.
דאס איז אלעס בקיצור, ווי געשריבן איז דא נאך הונדערטער זאכן וואס מ'קען אויסשמועסן, אבער הזמן יכלו והם לא יכלו.

אונז אידישע קאווע ליבהאבער'ס האבן א פראבלעם שבת, איז גוט צו וויסן אז ס'איז אויך דא א מעטאד וואס הייסט די 'קאלט בראטן מעטאד', דאס ארבעט דורך אריינלייגן די קאווע שטויב אין וואסער פאר 20 שעה, גוט אויפשאקלען און עס לאזן אין א טרוקן פלאץ טייד צוגעמאכטערהייט, נאך 20 שעה וועט עס ווערן א קאנצעטרירטן סענס, איך האב עס נאכנישט אויספראבירט אבער די מבינים רעקאמענדן עס פאר מענטשן וואס ליידן אויפן מאגן ווייל די מעטאד נעמט ארויס אלע עסיד'ס אלנפאלס בעסער ווי אינסטענט קאווע איז עס מסתם. (בפשטות מעג מען עס נאר מאכן אין א כלי שלישי)

אין א נעקסטע געלעגנהייט וועל איך בלי נדר צולייגן אינטערסאנטע פאקטן און ידיעות איבער דעם חשובן געטראנק.


פי.די.עף. צום פרינטן - צוגעלייגט בילדער
רעדאגירט געווארן צום לעצט דורך 2 אום DotCom, רעדאגירט געווארן 0 מאל בסך הכל.
לול'ן לול'ט ווער ס'לול'ט דער לעצטער (-י.ל.)

דער אשכול פארמאגט 70 תגובות

איר דארפט זיין א רעגיסטרירטער מעמבער און איינגעשריבן צו זען די תגובות.


רעגיסטרירן איינשרייבן
 
רעאגיר