וואס האט דא פאסירט?

[admin]

מיר ווילן זיך אנטשולדיגן פאר אונזערע טייערע חברים אויף דעם וואס "קאווע שטיבל" איז נישט געווען אין דינסט פאר נאנט צו צוויי טעג – פון דאנערשטאג נאכמיטאג, ביז יעצט. טראצדעם וואס דאס האט געשאפן א סך אומאנגענעמליכקייטן פאר יעדן, איז אבער דאך גוט צו וויסן אז די סיבה פון דעם קראך איז דווקא געווען א פריידיגע.

ווען "קאווע שטיבל" האט זיך געעפנט מיט קנאפע 9 חדשים צוריק האבן מיר נישט גע'חלומ'ט פון אזא שנעלן וואוקס ב"ה, און מיר האבן גענומען א ביליגע סערווער פירמע וואס מיר האבן גערעכנט אז ס'וועט קענען דערטראגן דעם טראפיק פון אונזער סייט. מיט דעם וואוקס פון אונזער לייענערשאפט איז דער טראפיק אבער גאר שטארק געשטיגן ביז ס'האט געגרייכט צו א מצב אז די פירמע האט אויסגעשאלטערט אונזער סייט וויבאלד דער טראפיק-פלייץ פארשטייטערט אלע אנדערע וועבסייטס וועלכע געפינען זיך אויף דעם זעלבן סערווער.

מיר האבן פרובירט זיך איינ'טענה'ן מיט דער פירמע אז מ'זאל נאך לאזן דעם סייט אנגיין פאר א טאג צוויי ביז מיר געפינען אן אנדערן סערווער, אבער זיי האבן געזאגט אז ס'איז אוממעגליך פון זייער זייט, ווייל זיי קענען נישט בא'עולה'ן אלע אנדערע וועבסייטס וועלכע ליידן א דאנק אונזער גרויסן טראפיק. אונזער סייט איז טאקע באלד אויסגעשאלטערט געווארן און מיר האבן זיך תיכף ארויסגעלאזט זוכן א סערווער וואס קען אקאמאדירן אונזער טראפיק. פון דעם ערשטן מינוט אן האבן מיר געהאלטן אונזערע חברים אינפארמירט איבער די געשעענישן דורך אונזער "טוויטער"-אקאונט.

מיר זענען זייער דאנקבאר פאר די צענדליגער חברים וועלכע האבן צו אונז געשריבן אנבאטנדיג הילף און געלט אויף צו קענען ווייטער אנגיין מיט דעם וויכטיגן ארבעט.

יעצט האלטן מיר שוין אין די לעצטע שטאפלען פון אריבערפירן דעם סייט, נאר מאמענטאל דארף מען זיך באנוצן מיט דעם צייטווייליגן יו-אר-על, ביז אלעס וועט מסודר ווערן על צד היותר טוב.

מיר בעטן נאכאמאל אנטשולדיגונג אויף דער אומאנגענעמליכקייט, און מיר דאנקען נאכאמאל אלע חברים פאר דעם געדולד און פארשטענדעניש.

[משולם שטיינפעלד]

יישר כח פארן האלטן אינפארמירט.

האט מען כאטש גענומען א סערווער וואס קען אקאמאדירן די צוקונפטיגע אסטראנאמישע וואוקס?

[ראשעקאל]

יוי האב איך געציטערט.............

[זר זהב]

למעשה האט מיין ''סיג לכחמה שתיקה'' אשכול אויפגעטון. פאר 2 גאנצע טעג האט יעדער ניק אן אויסנאם איינגענומען א שטילשווייגעניש

[ראשעקאל]

עס דאכט זיך מיר אז די סייט גייט יעצט שנעלער ווי ס'פלעגט גיין. נאך איינער פילט עס??

[לאדיך אפ]

כ'האב מורא געהאט אז יענע חברה האבן מסדר געווען דעם שטיבל... בד"וו, די לינק ביי kaveshtiebel.com איז נישט גוט מ'דארף עס פיקסן. ווי לאנג גייט נעמען ווילאנג די געהעריגע לינק גייט זיין צוריק?

[בן תמליון]

ברוך מחיה המחים. איך האב אויך גאנץ גוט געציטערט די לעצטע פאר טעג ב"ה מ'איז אפגעקומען מיט שרעק.

[גאלד]

דער אלטער האוסטינג פירמע ווי דער דאמעין איז רעגיסטרירט קען נישט מאכן א רידיירעקט דערווייל?

[קאווע טרינקער]

למעשה האט מיין ''סיג לכחמה שתיקה'' אשכול אויפגעטון. פאר 2 גאנצע טעג האט יעדער ניק אן אויסנאם איינגענומען א שטילשווייגעניש

לאו דוקא, איי וועלט האט זיך אויפגעוועקט פאר א פאר מינוט, ס'געווארן לעבעדיג, זיי האבן געמוזט פארשפארן אשכולות ווייל מאנכע ק"ש האבן זיך דארט אנגעריקט.

[איך אויך]

ברוך מחיה המחים. איך האב אויך גאנץ גוט געציטערט די לעצטע פאר טעג ב"ה מ'איז אפגעקומען מיט שרעק.

[טעפל]

אההה ברוך מחיה המתים אלץ איז צוריק... ביי דע וועי פון וואו האט דער עולם געוואוסט אהער צו קומען? (איך? פון היידפארק).

[קאווע טרינקער]

ביי דע וועי פון וואו האט דער עולם געוואוסט אהער צו קומען? (איך? פון היידפארק).

נסיתי ארבעים פעמים עד שנושעתי והבטחתי לפרסם

[זר זהב]

איך האב געזאגט פרק שורה און ווען כ'בין אנגעקומען צו "סקאנק מא הוא אומר" איז קאווע צוריק ארויפגעקומען.

[Java]

דער אלטער האוסטינג פירמע ווי דער דאמעין איז רעגיסטרירט קען נישט מאכן א רידיירעקט דערווייל?

יא, דאס האבן מיר טאקע געטון אויף דערווייל. די דאמעין דארף אנצוהייבן פוינטן צו די נייער סערווער אין די קומענדיגע 24 שעה. איך טוה זיך נאכאמאל אנטשולדיגן פאר די אומאנגענעמליכקייטן וואס די מצב האט געשאפן. מיר האפן אז אין די צוקונפט וועלן מיר זיך שנעלער מסדר זיין.

[געפילטע פיש]

אנטשולדיג אייך נישט אזוי סאך, איר טוהט מעל ומעבר פון וואס איר דארפט, נישט פאר קיין געלט, נישט פאר קיין כבוד, נאר אריינצוברענגען די אור פון די תורה און אידישקייט למטה מעשרה, אויפן טריפה'נעם אינטערנעץ, אריינצושיינען אין די ליבות נשברות די אוטענטישע שיין פון יהדות אן קיין השפעות פון די יונים, רוימים, און די קריסטן וכל שום וחניכא דאית להו.

חזקו ואמצו, יישר חילכם, און לאודס מיט הצלחה בכל מעשי ידכם.

[ענן כבד]

עס דאכט זיך מיר אז די סייט גייט יעצט שנעלער ווי ס'פלעגט גיין. נאך איינער פילט עס??

אויפן דעסקטאפ זעה איך נישט קיין גרויסע חילוק, אבער אויפן טאשן-קאמפיוטער באמערק איך א שיינעם ספיד אינקריעס.

[קופערניקוס]

ברוך מחיה המתים!
איך מיין נישט צו זאגן מחיה מתים אויף די שטיבל, איך מיין אויף מיר!
איך פלעג מיינען אז קאווע שטיבל איז אזא לוקסוס מיינע, אזא אם לא יועיל לא יזיק אפאראט, א זיסע טשאקלעד נאך די סעודה... אזוי האט זיך מיר געדוכט, אבער אזוי ווי אסאך זאכן מיט וועמען מען דערקענט זיך נאר בהעדרו - אזוי ווי ציין וואס מען שפירט נאר ווען ער רייסט פאר יסורים, האב איך געזעהן אז קאווע שטיבל איז לכל הפחות אזוי ווי מיין שטארקע קאווע, מיין טעגליכע דאזע קאפין!
איך בין געווען טויט די פאר טעג וואס קאווע שטיבל האט גע'גוסס'ט, איך האב געשפירט ווי א פיש אינדרויסן פון וואסער, א סקווערער אן שטיוול, א סאטמארער אום כ"ז אב תשל"ט, א ציוני נאך אבאמאס געווינס וכו', איך האב געשפירט אויסגעשאלטערט, מלא ספיקות, צוקלאפט און נידערשלאגן.
איך האב נישט געוואוסט וואס עס גייט פאר, איך האב אנגעהויבן טראכטן אז וועבערמאן איז אומשולדיג - יא שולדיג, אן קענען מחליט זיין, אן קענען ליינען יאסעלע וואסער טרעגער און איחוד פעלד. איך האב נישט געוואוסט וואס זר זהב טוט אויף די מינוט, אדער וואס מען קען עסן פאר לאנטש, וואס מען קען טון מיט א פוילע ווייב, אדער ווי מען טרעפט אין מאמרי חז"ל דעם מאחורי הפרגוד. בקיצור איך בין געווען אנגעזעצט.
עס איז נאר דא קאווע שטיבל? עה, נאך אסאך סייטס... בין איך געגאנגען זוכן, ב"ה אז דזשעי-נעט האט מיר נאר געלאזט גיין בתוככי אנ"ש, קודם גיי איך זעהן עפעס א אידישע זייטל, אבער וואס האב איך געזעהן? תולדות האדמו"ר מהוידא-פלאץ השלישי, די דינסטאג אשכול, טראפיק באריכטן פון האנג-קאנג, און א אשכול ווי מען דארף זיך כלומרשט צו טענה'ן, אבער עכט זינגט יעדער די זעלבע ניגון. בין איך געגאנגען אין עפעס א פארק, זעה איך דארטן א וויכוח ווער עס האט געהאט מער מענטשן כולל זיבנבערגן אדער כולל שומרי החומות, מיט נאך אזוינע אינטעליגענטע שמועסן. פארצווייפלטערהייט האב איך געזוכט אונזער ליבע שטיבל, איך בין געווען טרויעריג, די חנוכה ליכט האבן מיר געטאנצן אין די אויגן, אבער די שמחה איז נישט געווען בשלימות, די קאסטארד פון די דאנאטס האט מיר ממש אויסגעזעהן ווי נאז געמויזעכץ, ממש פחדים.
ברוך השם אז קאווע שטיבל איז צוריק,
אוי, בך בטחו, חסדי ה' כי לא תמנו!
און מיט דעם קען מען פארענטפערן די בית יוסף'ס קשיא וואס ווערט שוין באמת געברענגט אין פרי חדש... די אכטע טאג איז פאר די נס פון מציאת הקאווע שטיבל!

[נולד מאוחר]

וויפיל געלט רעדט מען דא, וואס קאסט א האסטינג מיט א סערווער?

[sunbar]

עס האט אויך געהאלפן אז מען זעט אז טאמבל איז סטיל אלייוו

[גאלד]

וויפיל געלט רעדט מען דא, וואס קאסט א האסטינג מיט א סערווער?

ווי איך פארשטיי איז דאס דער נייער האוסטינג פירמע

http://www.inmotionhosting.com/

זעה דארט די פרייזן,

נאכדעם איז דא אפאר טאלער א יאר פארן האבן די זכות פון די דאמעין נאמען kaveshtiebel.com

[נולד מאוחר]

נא ווער ספאנסרט דאס?
אפשר זאל מען מאכן א שטיקל אפיעל .
נולד שני פעמים חי. ערענסט.

דערנאך זאל מען מאכן א לאסאוט קעגען קרויס/וועברמאן ווענד זיך ווער סקומט ארויס שולדיג, פארן גורם זיין אזא טרעפיק דא וואס האו אראפ געברענגט אונזער שטובעל פאר צוויי טאג. איך בין זיכער זר זהב קען קלעם לאס אף ווארק.

[אויס מענטש]

איך בין געווארן "אויס מענטש"
איך האב געדרייט צו נעמען "דיפאזיטארי" ווי ביי א תענית אבער עס האט געהאלפן א ניקס,

[נולד מאוחר]

Absence makes the heart grow fonder