די קינדער פארדאַרבן די קהילות הקודש

נייעס און פאסירונגען אין הויפן

די קינדער פארדאַרבן די קהילות הקודש

הודעהדורך העניך » מאנטאג אקטאבער 18, 2021 10:08 am

די קהילות הקודש זענען אפיציעל אויפגעשטעלט געווארן מפיץ צו זיין תורה וחסידות, און העלפן אידן זיך מחזק זיין אין עבודת השם. די מייסדים פון די הייליגע קהילות זענען געווען גאר הייליגע אידן וואס האבן פון זיך אלעס אוועקגעגעבן צו זיין עבדים לעבדי השם, פשוט לקרב ישראל לאביהן שבשמים.

די סברא וואלט געווען, אז אויב דאס זאל זיין דער עיקר כוונה פון די מייסדים, וואלט יעדער באשלוס וואס זיי וואלטן געמאכט אין דער קהילה געווען צו פאראויסרוקן אט דעם ציל: העלפן די בני הקהילה מיט זייער אידישקייט אויף דעם בעסטן אופן וואס איז שייך. למעשה זעט מען אבער אז די באציאונג פון די רבי'ס צו דער קהילה איז ווי צו זייער אייגנטום. ס'גילט דערביי דיני ירושה, און זיי מאכן זיכער אז זייערע צאצאים וצאצאי צאצאים זאלן ארויסנעמען דעם מאקסימום בענעפיטן פאר א לעבן פון געלט און כבוד.

עס פאנגט זיך אן ביי דעם אז אנשטאט אויסקלויבן דעם חשוב'סטן תלמיד אדער חסיד וואס זאל איבערנעמען די קהילה נאך דעם רבי'נס פטירה, מוז עס זיין א זון פון רבי'ן. אבער אויף דעם אליין קען מען אפשר ענטפערן א דוחק תירוץ אז דער איינגעשטעלטער סיסטעם אז א זון נעמט איבער ברענגט סטאביליטעט צו א קהילה. איך האלט קלאר אז דאס איז נישט קיין גוטער תירוץ מחמת כמה וכמה טעמים, אבער פאר דעם צוועק פון דעם ארטיקל, וויל איך אננעמען אז ס'איז אפשר יא א גוטער תירוץ.

אבער ס'גייט נאך ווייטער ווי דעם ממלא מקום. אין א קהילה באקומען אלע קינדער פון רבי'ן שטעלעס וואס וואלטן געדארפט גיין פאר די וואס זענען די מערסטע מוכשר דערפאר. ס'איז דאך פשוט אז דעם רבינ'ס קינדער און איידעמער זענען נישט פערצופאל די בעסטע קאנדידאטן פאר יעדער חשוב'ער שטעלע אין דער קהילה, ווי דיינות, ראש ישיבה, ראש הכולל, חתן מדריך, וכו'. אבער זיי באקומען דאס אפגעזען פונעם פאקט אז אין גרויסע קהילות פון צענדליגער טויזנטער יראים ושלמים זענען געוויס דא פיל בעסערע קאנדידאטן וואס וואלטן פיל מער ביישטייערט צו דעם רוחניות'דיגן וואוקס פון די בני הקהילה.

די נקודה האט מיך געשלאגן ווען כ'האב געלייענט אין די בלעטער באריכטן איבער די ימים נוראים אין די קהילות הקודש, און איבעראל האב איך געזען אז רוב פון די תפילות זענען פארגעדאוונט געווארן דורך קינדער און אייניקלעך פון רבי'ן. איז טאקע צווישן טויזנטער בעלזער חסידים נישט פאראן קיין ת"ח ונשוא פנים, א ירא שמים וואס קולו נחמד וערב, וועלכער וואלט בעסער מעורר געווען דעם ציבור ווי דעם רבינ'ס 28-יעריגער אייניקל? ווי קומט אזא -- לאמיר עס רופן סעלפישקייט -- אנצולייגן אויפ'ן ציבור בעלי תפילה וואס זענען וואוילע יונגעלייטלעך, און נישט געבן פאר חשוב'ע אויסגעשטיגענע אידן די געלעגנהייט צו דינען אויף אזעלכע פאזיציעס? קומט נישט דעם ציבור צו הערן א תפילה פון א איד וואס האט געהארעוועט און איז אויסגעשטיגן גאר הויעך?

און דאס ווערט נאך ערגער און ערגער. צווישן די באריכטן האב איך געלייענט אזוי:
"צו מנחה דעם ערשטן טאג יו"ט [אין בעלזא] איז צוגעגאנגען הרב שלום שליט"א, איבערנעמענדיג די חזקה פון הרה"ח רבי יצחק לאנדא ע"ה – משב"ק הרה"ק מבעלזא, וואס האט געהאט די חזקה צו דינען אלס שליח ציבור ביי מנחה דעם ערשטן טאג ראש השנה."

"תפלות שחרית [אין באבוב-45] האט געדאוונט בנו הגדול הרה"צ רבי יוסף שליט"א ר"י קטנה, וועלכער האט איבערגענומען די חזקה פון הרה"ח ר' אברהם קנאבליך ע"ה וואס איז נפטר געווארן דעם פארגאנגענעם זומער."

און נאך ענליכע באריכטן.

דאס הייסט אמאליגע עלטערע פראמינענטע חסידים פלעגן האבן חשוב'ע פאזיציעס אלס בעלי תפילה, אבער ווי זיי גייען פון דער וועלט, ווערט דאס תיכף אנגעפילט דורך די בנים ובני בנים, וועלכע זענען נאר פרה ורבה.

אינעם מאנומענטאלן ארטיקל "וילך שאול ואנשיו", האט זיך אין א הערה'לע (17) באהאלטן א מורא'דיגע אבזערוואציע: די דריי רבי'ס וואס האבן אויפגעשטעלט די גרעסטע קהילות נאכ'ן קריג האבן נישט פארמאגט קיין קינדער: האדמו"ר בעל בית ישראל מגור, האדמו"ר מסאטמאר, און האדמו"ר מליובאוויטש. צו דעם דארף מען צולייגן די פערט-גרעסטע קהילה, האדמו"ר מבעלזא. נישט אומזיסט האבן די פיר רבי'ס אן קיינע קינדער געהאט די גרעסטע הצלחה מיט'ן אויפבויען לגיונות של מלכות, ווייל זייער ציל איז נישט פארדאָרבן געווארן מיט'ן בויען פאר זיך און דער דינאסטיע. זיי האבן אוועקגעגעבן אלעס וואס זיי האבן געהאט פאר זייער קהילה און פאר די צילן וואס זיי האבן געהאט צו בויען די קהילה. אט אזוי זעט מען אזא הצלחה און סייעתא דשמיא.

די היינטיגע ממשיכי דרך פארמאגן שוין ריזיגע באזעס געבויט דורך רבי'ס אן קיין קינדער, אבער זיי אליין פרוכטבארן זיך כדגי הים. און נוצן אט די ממלכת כהנים פאר די אייגענע אינטערעסן און די אינטערעסן פון זייער דינאסטיע. דאס איז א ווייטאג, און די עצה דערפאר האב איך נישט. אבער רעדן דערפון דארף מען.
האט איר הנאה געהאט פון מיין ארטיקל? גיט א 'לייק' און שיקט א לינק צו אייערע פריינט. אבער בשום אופן נישט קאפירן דעם גאנצן ארטיקל און שיקן ווייטער - אדם אוסר את שלו.
באניצער אוואטאר
העניך
שריפטשטעלער
שריפטשטעלער
 
הודעות: 807
זיך רעגיסטרירט: מאנטאג יאנואר 25, 2016 6:54 pm
האט שוין געלייקט: 949 מאל
האט שוין באקומען לייקס: 3590 מאל

הודעהדורך יאסל ראקאווער » מאנטאג אקטאבער 18, 2021 11:21 am

ס'איז דא צוויי בענעפיטן (מסתמא מער אויך) פון רעדן דערפון אפילו מ'האט נישט קיין עצה. די ערשטע בענעפיט איז, דורך רעדן דערפון פארשטייט מען אביסל די מצב פון די כהונה בזמן בית שני וויאזוי ס'איז דאקומענטירט און חז"ל. טאקע אפשר אביסל מוגזם און חז"ל אבער פון די טיפע ווייטאג פון צווישען די שירות פון חז"ל זעעט מען די וויי געשריי פון די @העניך בזמן בית שני. תורה הוא וללמוד אנו צריכים. שכויעך רב העניך.

די צווייטע בענעפיט, און מער פראקטישע בענעפיט איז, קלארקייט און די ענין פון רבי'ס וואס נעמט ארום די אידען און די סיסטעם הונדרעט פראצענט פון זייער לעבן, גוט אונז די שליסלעך זיך אליינס צו קוקען און שפיגעל מיט אויטענטישקייט און פארשטיין אונזער צרה. פארשטיין בעסער די אייגענע פראבלעמען איז א ריזיגע נחמה.

למעשה זיין אין א רילעשענשיפ פון gas lighting איז שרעקליכע יסירי נפש. (יא, נו, אוודאי, רבי'ס און קהילות איז א רילעשענשיפ) די gut זאגט עפעס טויג נישט און מ'קען זיך נישט ארויסזען פונקטליך וואס.

גוט ארויס האבן די דורך און דורך די פרעכקייט פון די מיסט קאסטען פון די רבישע סיסטעם איז ממש וויכטיג וו ליפט צו אטעמען.

דאס איז ריכטיגע שמחה של התרת הספיקות!
הנח לו ליוסל, איך בין נישט קיין נביא, איך בין נישט די משנה ברורה. מיינע ווערטער איז נישט געמאסטן!

פארטייטש מיך נישט, און ליין נישט צווישען די שורות
יאסל ראקאווער
ידיד השטיבל
ידיד השטיבל
 
הודעות: 339
זיך רעגיסטרירט: זונטאג סעפטעמבער 15, 2013 2:30 pm
האט שוין געלייקט: 160 מאל
האט שוין באקומען לייקס: 580 מאל

הודעהדורך רימון » מאנטאג אקטאבער 18, 2021 11:59 am

צוויי קליינע הערות איבער העניכ'ס אינטערעסאנטע אבזערוואציע.
אין פיל פעלער, איז געבן פאר דעם רבינ'ס קינדער און איידעמער וכדו', פשוט די גרינגערע וועג ארויס. אין אזא קהילה ווי בעלזא, אויב הויבט מען אן טיילן ברעטלעך פאר דעם און יענעם, קען זיך עפענען א קאנע פון ווערים און מ'וועט קיינמאל קיינעם נישט צופרידנשטעלן.

כ'בין אמאל געווען ביי א רבישער חופה, וואו דער מחותן דער רבי האט גענומען פאר זיך אלע זעקס ברכות און גארנישט געגעבן פאר קיינעם. מענטשן האבן זיך זייער געוואונדערט, אזא משוגענער, א כבוד שמעקער, לאזט אלע שיינע אידן הענגען און נעמט זיך אלעס פאר זיך.
האב איך שפעטער צוריקגעהערט, אז דער מחותן איז פארנומען געווען שעות אריכות בימים החופה אויפצוקומען מיט א פלאן וויאזוי צו צעטיילן די ברכות אז יעדער זאל זיין צופרידן. נאכ'ן קומען צו דער החלטה אז ס'איז ממש נישט מעגליך צו געבן פאר יעדן און אויב גיט ער פאר אימ'ען וועט זיך יענער באליידיגן, האט ער אפגעמאכט אז ער נעמט אלעס פאר זיך און זאל מען אים בארעדן אלס א צעדרייטער.

נאך א כללות'דיגע הערה, איך בין נאך אלץ ביי דער מיינונג, אז די רבי'ס האבן די מאכט לויט וויפיל די חסידים געבן און ערלויבן, און זייער אסאך פלעצער זענען דעם רבי'נס קינדער בא'חנ'דלט ביים עולם און האבן גאר הנאה אז זיי דאווענען. אפילו ווען נישט, רוב חסידים האבן א בלינדע צוטרוי אין די פירערשאפט און ס'פאלט זיי נישט איין צו צווייפלען דערין. וואלטן מענטשן רעוואלטירט וואלטן די רבי'ס זיך געמוזט רעכענען דערמיט.

ממילא, אונזער פראבלעם איז נישט אז די רבי'ס נעמען זיך די מאכט, נאר אז מיר, ווי קעלבער, שענקען די מאכט בשתי ידים.
רימון
שריפטשטעלער
שריפטשטעלער
 
הודעות: 348
זיך רעגיסטרירט: דינסטאג אקטאבער 21, 2014 9:12 pm
האט שוין געלייקט: 1357 מאל
האט שוין באקומען לייקס: 1155 מאל

הודעהדורך מי אני » מאנטאג אקטאבער 18, 2021 12:27 pm

דאס איז וואס ר' מאטל זילבער האט טאקע גערעדט קעגן די היינטיגע סטייל "הנהגה". (אויך דערמאנט אינעם וועקער.)

מ'קען עס מצדיק זיין אז וויבאלד זיי זענען די "בני מלוכה" ווערן זיי שוין געגארט און טרענירט צו זיין מוכשר דערפאר מילדותם וממילא איז עס טאקע מער פּראבּעבּל אז זיי זאלן טאקע זיין מוכשר דערפאר (עכ"פ דאס איז די הנחה מעיקרא). מיינענדיג, אז all else being equal איז עס מער פּראבּעבּל אז ער איז מוכשר דערפאר גיווען אז ער איז א רבניש קינד ווי סתם אזוי; אזא בּעיזשיען סארט קאנדישינעל פּראבּעבּיליטי.

אבער מ'דארף טאקע געדענקן אז אפילו טאמער נעמט מען שוין יא אָן א דין "ירושה" דערביי, באזירענדיג זיך אויף רש"י, איז דאס אבער נאר טאמער ער איז טאקע "הגון" דערפאר. די שאלה איז טאקע טאמער ער איז טאקע "הגון" דערפאר אבער א צווייטער איז "מער הגון" דערפאר ווי ער, צי דאס נעמט אוועק פון זיין זיין למעשה "הגון" דערפאר אזוי אז מ'דארף אים איבערהיפן. מ'קען זאגן אז טאמער וואלט ער געווען באמת "הגון" דערפאר, וואס באדייט דאך אויך פארשטיין און מיינען דעם ריכטיגן טובת הכלל, וואלט ער פארשטאנען אז דאס איז טאקע די טובה פונעם כלל און ער וואלט אפגעטרעטן (אויב ער קען און ס'איז בידו).
רעדאגירט געווארן צום לעצט דורך מי אני אום מאנטאג אקטאבער 18, 2021 12:40 pm, רעדאגירט געווארן איין מאל בסך הכל.
"איך בין אפילו נישט זיכער אז איך עקזיסטיר, ווי אזוי קען איך זיין זיכער אז...?" - יאיר
"אלס וואס איך ווייס איז אז איך ווייס גארנישט (אחוץ דעם עצם פאקט)" - סקראטוס
און אפילו אין דעם בין איך אויך נישט זיכער
באניצער אוואטאר
מי אני
שריפטשטעלער
שריפטשטעלער
 
הודעות: 2751
זיך רעגיסטרירט: פרייטאג אקטאבער 05, 2018 4:32 pm
האט שוין געלייקט: 9469 מאל
האט שוין באקומען לייקס: 2200 מאל

הודעהדורך עמקות המחשבה » מאנטאג אקטאבער 18, 2021 12:38 pm

די שאלה איז לכאורה תלוי און רעלעטיוויטי ;) :lol:
THE LITERAL MEANING OF LIFE IS WHATEVER YOU'RE DOING
.THAT PREVENTS YOU FROM KILLING YOURSELF

Albert Camus-
באניצער אוואטאר
עמקות המחשבה
מאנשי שלומינו
מאנשי שלומינו
 
הודעות: 75
זיך רעגיסטרירט: דינסטאג פעברואר 16, 2021 6:13 am
האט שוין געלייקט: 535 מאל
האט שוין באקומען לייקס: 93 מאל

הודעהדורך בעל דרשן » מאנטאג אקטאבער 18, 2021 1:45 pm

א גוטע טעמע דורכצוטון
צום אלעם ערשט די גרינדער פון בעל שם טוב האט א תלמיד איבערגענומען און נישט א זון אפשר טאקע אז סזאל זיין א לימוד לדורות !

מ'האט דערמאנט די קהילות פון בעלזא און 45
איז כדאי צוצולייגן סקווירא ווי נאך רבי משה גרין א גאון הדור וואס לא פסיק פומיה מגירסיה האט אים איבערגענומען ר' חיים מאיר טווערסקי דעם רבי'ס יונגסטע זון
און בעל תוקע דארט איז ר' אהרן מענדלס זון יעקב יוסף וואס האט שונאים אין גאנצע שטעטל ואין כאן המקום להאריך
בעל דרשן
ידיד השטיבל
ידיד השטיבל
 
הודעות: 233
זיך רעגיסטרירט: פרייטאג יולי 06, 2018 7:05 pm
האט שוין געלייקט: 0 מאל
האט שוין באקומען לייקס: 72 מאל

הודעהדורך מורינו ורבנו » מאנטאג אקטאבער 18, 2021 3:03 pm

זעהענדיג דעם אשכול, קען איך זיך נישט איינהאלטן פון אריינרעדן, ווייל דער ענין איז דאך נוגע מיר פערזענליך.

איך קען אייך איין זאך זאגן אין קורצן: עס איז פשוט נישט מעגליך אנדערש!

נישט אומזינסט, וועט איר נישט טרעפן קיין איין קהילה בישראל, וואו עס פירט זיך אנדערש. ס'איז פשוט נישט מעגליך. ברענגט נישט קיין ראיה פון תלמידי בע"ש, ווייל דארט איז דער גאנצער מצב געווען אנדערש, ס'איז נישט געווען דומה לדומה צו די היינטיגע חסידות, און אפילו נישט צו די היינטיגע חבריות.

אין אן אנדערן געלעגנהייט וועל איך מער מאריך זיין.
מורינו ורבנו
שריפטשטעלער
שריפטשטעלער
 
הודעות: 115
זיך רעגיסטרירט: מאנטאג מאי 24, 2021 5:13 pm
האט שוין געלייקט: 0 מאל
האט שוין באקומען לייקס: 145 מאל

הודעהדורך היסטאריע » מאנטאג אקטאבער 18, 2021 3:30 pm

דער איינציגסטער אמת'ע עצה איז, עס זאל זיך עפענען קהילות ווי שוואמען, קאמפעטישן וועט שוין לעזען די פראבלעם פין זיך אליינס.
היסטאריע
מאנשי שלומינו
מאנשי שלומינו
 
הודעות: 131
זיך רעגיסטרירט: מאנטאג מערץ 01, 2021 5:58 pm
האט שוין געלייקט: 9 מאל
האט שוין באקומען לייקס: 162 מאל

הודעהדורך הוגה » מאנטאג אקטאבער 18, 2021 5:34 pm

בעל דרשן האט געשריבן:צום אלעם ערשט די גרינדער פון בעל שם טוב האט א תלמיד איבערגענומען און נישט א זון אפשר טאקע אז סזאל זיין א לימוד לדורות !


די חסידים פונעם ממשיך פון רבי צדוק הכהן מלובלין (כ'קען מיך נישט דערמאנען דעם נאמען כרגע) פלעגן זיך גרויסן אז זייער רבי איז צען דורות תלמיד אחר תלמיד ביזן בעש"ט, לאפוקי די רבישע שושלת'ער וואס האבן זיך דעמאלטס שטארק פארשפרייט. הבעש"ט, המגיד, הרבי רבי אלימלך, החוזה מלובלין, היהודי הק', הרבי רבי בונם, הקאצקער, האיזביצער, רבי לייבל אייגר מלובלין, רבי צדוק הכהן מלובלין, ממשיך דרכו של רבי צדוק.

טראץ וואס העניך לייגט גוט און לאגיש אראפ זיין טענות, איז וויכטיג צו באטאנען אז ס'קען זיין נאך פאקטארס דא וואס מען דארף ארייננעמען אינעם דיסקוסיע. לדוגמא, power corrupts קען זיין אן אינטעגראלע אינגרידיענט אין יעדע סארט הנהגה. דאס מיינט נאכנישט אז צוליב דעם זאל מען אויפגעבן אויף זוכן דעם פאסיגסטע קאנדידאט. עס מיינט אבער אז עס מוז נישט זיין אז דער יונגע רבי איז קארופטירט צוליב דעם וואס ער איז א בנש"ק. עס קען זיין אז ער איז קארופטירט צוליב דעם וואס power קארופטירט. קוקט אייך אום וועט איר זעהן א סאך געווארענע פירער זענען מיט די צייט געווארן אנדערע מענטשן.


.
"לא מצאנו בשום מקום בתורה שמצווה אדם להיות למדן ובקי בכל חדרי התורה. שכן תכלית הלימוד אינה להיות למדן אלא להיות אדם טוב, לעשות הטוב ולהטיב לזולתו." ~ רמ"מ מקאצק ז"ל
באניצער אוואטאר
הוגה
שריפטשטעלער
שריפטשטעלער
 
הודעות: 3056
זיך רעגיסטרירט: דינסטאג אפריל 09, 2013 1:20 pm
געפינט זיך: מאנסי
האט שוין געלייקט: 7957 מאל
האט שוין באקומען לייקס: 7004 מאל

הודעהדורך קאצקע ציקער » מאנטאג אקטאבער 18, 2021 6:08 pm

מורינו ורבנו האט געשריבן:זעהענדיג דעם אשכול, קען איך זיך נישט איינהאלטן פון אריינרעדן, ווייל דער ענין איז דאך נוגע מיר פערזענליך.

איך קען אייך איין זאך זאגן אין קורצן: עס איז פשוט נישט מעגליך אנדערש!

נישט אומזינסט, וועט איר נישט טרעפן קיין איין קהילה בישראל, וואו עס פירט זיך אנדערש. ס'איז פשוט נישט מעגליך. ברענגט נישט קיין ראיה פון תלמידי בע"ש, ווייל דארט איז דער גאנצער מצב געווען אנדערש, ס'איז נישט געווען דומה לדומה צו די היינטיגע חסידות, און אפילו נישט צו די היינטיגע חבריות.

אין אן אנדערן געלעגנהייט וועל איך מער מאריך זיין.

אינטערסאנט אז נאכן קריג איז יא געווען מעגליך אנדערש, נישט נאר דאס נאר אמאל האט מען יא געקענט נעמען שיינע יודן און אפילו קרובים צום רבין. היינט איז עס אויסדריקלעך נאר קינדער און אייניקלעך

גראדע אז מען רעדט פון בעלזא די בעלי תפילה דארטן איז בכלל נישט קיין רבישער , ירמיה דמן דאווענט דארט פאר יעדן פרייטאג צונאכטס
באניצער אוואטאר
קאצקע ציקער
וְאֶת־הָאֶ֜לֶף
וְאֶת־הָאֶ֜לֶף
 
הודעות: 1893
זיך רעגיסטרירט: פרייטאג אפריל 06, 2012 1:46 am
האט שוין געלייקט: 987 מאל
האט שוין באקומען לייקס: 959 מאל

הודעהדורך ארי נוהם » מאנטאג אקטאבער 18, 2021 6:26 pm

הוגה האט געשריבן:
בעל דרשן האט געשריבן:צום אלעם ערשט די גרינדער פון בעל שם טוב האט א תלמיד איבערגענומען און נישט א זון אפשר טאקע אז סזאל זיין א לימוד לדורות !

די חסידים פונעם ממשיך פון רבי צדוק הכהן מלובלין (כ'קען מיך נישט דערמאנען דעם נאמען כרגע) פלעגן זיך גרויסן אז זייער רבי איז צען דורות תלמיד אחר תלמיד ביזן בעש"ט, לאפוקי די רבישע שושלת'ער וואס האבן זיך דעמאלטס שטארק פארשפרייט. הבעש"ט, המגיד, הרבי רבי אלימלך, החוזה מלובלין, היהודי הק', הרבי רבי בונם, הקאצקער, האיזביצער, רבי לייבל אייגר מלובלין, רבי צדוק הכהן מלובלין, ממשיך דרכו של רבי צדוק.

דאס איז רבי אברהם משה וויינטרויב ממארקישוב.

עי' כאן: https://jewiki.org.il/w/%D7%A8%D7%91%D7 ... 7%95%D7%91

פארט אבער, האט נאך אים איבערגענומען... זיין זון.
אין ארי נוהם מתוך קופה של תבן, אלא מתוך קופה של בשר (ברכות לב.) ובימינו אין ארי נוהם אלא מתוך קופה של תבן (ארי נוהם)
באניצער אוואטאר
ארי נוהם
שריפטשטעלער
שריפטשטעלער
 
הודעות: 472
זיך רעגיסטרירט: זונטאג מערץ 27, 2016 3:13 am
האט שוין געלייקט: 1214 מאל
האט שוין באקומען לייקס: 1857 מאל

הודעהדורך גאנצל » מאנטאג אקטאבער 18, 2021 9:23 pm

צ/ק

די קידער פארדארבן וואס ? די קהלה ? וועלכע קהלה ? די קהלה וואס ס'איז שוין אין דיינע ארטיקלען סיי ווי פרדארבן פון בעפאר

אבי צו פירקלערן בלעטער נאך בלעטער זעלבסט איינגערעדטע דברי חכמה און זיך קלאפן אויפן אייגענע רוקן אויף די אייגען איינגערעדטע דברי פקחות
גאנצל
חבר ותיק
חבר ותיק
 
הודעות: 3056
זיך רעגיסטרירט: דאנערשטאג יולי 11, 2013 1:18 pm
האט שוין געלייקט: 501 מאל
האט שוין באקומען לייקס: 1193 מאל

הודעהדורך מפיל קינד » מאנטאג אקטאבער 18, 2021 11:42 pm

ס'איז באקאנט דאס ווארט, פארוואס ווען א רבי שטארבט ווערן די קינדער רבי'ס, און ווען א בדחן שטארבט ווערן נישט זיינע קינדער בדחנים?

ווייל צו זיין א בדחן דארף מען קענען...
מפיל קינד
וְאֶת־הָאֶ֜לֶף
וְאֶת־הָאֶ֜לֶף
 
הודעות: 1007
זיך רעגיסטרירט: דינסטאג סעפטעמבער 05, 2017 1:08 am
האט שוין געלייקט: 728 מאל
האט שוין באקומען לייקס: 981 מאל

הודעהדורך בן נון » מאנטאג אקטאבער 18, 2021 11:57 pm

גאנצל האט געשריבן:צ/ק

די קידער פארדארבן וואס ? די קהלה ? וועלכע קהלה ? די קהלה וואס ס'איז שוין אין דיינע ארטיקלען סיי ווי פרדארבן פון בעפאר

אבי צו פירקלערן בלעטער נאך בלעטער זעלבסט איינגערעדטע דברי חכמה און זיך קלאפן אויפן אייגענע רוקן אויף די אייגען איינגערעדטע דברי פקחות


א שאד אז עס איז נישט דא א דיסלייק קנעפל ארויסצווויזן אומצעפרידנהייט מיט דיין דברי פקחות
ונער לא ימוש מתוך הקאווע שטיבל
בן נון
מאנשי שלומינו
מאנשי שלומינו
 
הודעות: 143
זיך רעגיסטרירט: מיטוואך יולי 21, 2021 8:12 pm
האט שוין געלייקט: 33 מאל
האט שוין באקומען לייקס: 163 מאל

הודעהדורך berlbalaguleh » דינסטאג אקטאבער 19, 2021 8:33 am

העניך: דו ביסט גערעכט , אלס כלל. אבער ס'איז אייביג דא א יוצא מן הכלל.

למשל ביי דעם חסידות וואס איך בין נאנט. דער רבי שליט"א האט עטליכע זון. דער עלסטער (נישט דער בכור) זון, וועלכער ווערט ארויפגעקוקט אין די קהילה אלס ממלא מקום אביו. ער איז א יונגערמאן א גרויסער תלמיד חכם, וירא שמים מרבים. אבער א צוגעלאזענער מענטש. איך ווילל נישט אנגעבן מער סימנים ווייל דער (גאנצער) עולם וועט תיכף וויסן פון וועם די רעדע איז.

זיין טאטע, די רבי שליט"א האט מייסד געווען א (גרויסן) כולל. ער ארבעט שווער דאס אויפצוהאלטן לשם ולתפארת. אבער דער ראש הכולל איז נישט זיין זון. נייערט (ווי חיים גראדע האט ליעב געהאט צו זאגן.) א צווייטער. אויך א טויגליכער יונגערמאן א ת"ח וירא שמים.

אני הקטן. אלס חסיד פון יענע חסידות האט עס מיך שטארק געבאדערט. איך האב מיך אויסגעדרוקט צו איינעם פו די אינסייד מענטשן..."פארוואס גייט ער נישט זיין ראה"כ ביי זיין טאטן"... דער תירוץ איז אז זיין טאטע האט נישט קיין כולל. אבער וואס זעה מיר פון דעם. אז נישט אייביג ווערט דער זון אדער איידעם פונ'ם אדמו"ר געקרוינט צו אלע פאזיציעס...!
באניצער אוואטאר
berlbalaguleh
שריפטשטעלער
שריפטשטעלער
 
הודעות: 15857
זיך רעגיסטרירט: דינסטאג יולי 17, 2012 12:57 pm
האט שוין געלייקט: 18504 מאל
האט שוין באקומען לייקס: 10559 מאל

הודעהדורך העניך » דינסטאג אקטאבער 19, 2021 9:16 am

גאנצל האט געשריבן:צ/ק

די קידער פארדארבן וואס ? די קהלה ? וועלכע קהלה ? די קהלה וואס ס'איז שוין אין דיינע ארטיקלען סיי ווי פרדארבן פון בעפאר

אבי צו פירקלערן בלעטער נאך בלעטער זעלבסט איינגערעדטע דברי חכמה און זיך קלאפן אויפן אייגענע רוקן אויף די אייגען איינגערעדטע דברי פקחות

יאפ, ס'איז זייער שווער צו דיעלן מיט'ן פאקט אז נישט קיין חילוק וויפיל כשרון, תורה, עבודה און יראת שמים דו זאלסט נאר האבן, וועט דיין רבינ'ס יוצא חלציו זיין פאַר דיר מיט יעדן פּאָסטן און אויפגאבע צו העלפן אידן מיט עבודת ה'.

אטאקיר גערן דעם מעסענדזשער, אויב עס מאכט דיר פילן בעסער.
באניצער אוואטאר
העניך
שריפטשטעלער
שריפטשטעלער
 
הודעות: 807
זיך רעגיסטרירט: מאנטאג יאנואר 25, 2016 6:54 pm
האט שוין געלייקט: 949 מאל
האט שוין באקומען לייקס: 3590 מאל

הודעהדורך העניך » דינסטאג אקטאבער 19, 2021 9:23 am

רימון האט געשריבן:צוויי קליינע הערות איבער העניכ'ס אינטערעסאנטע אבזערוואציע.
אין פיל פעלער, איז געבן פאר דעם רבינ'ס קינדער און איידעמער וכדו', פשוט די גרינגערע וועג ארויס. אין אזא קהילה ווי בעלזא, אויב הויבט מען אן טיילן ברעטלעך פאר דעם און יענעם, קען זיך עפענען א קאנע פון ווערים און מ'וועט קיינמאל קיינעם נישט צופרידנשטעלן.

פלוצלינג ווערט מען מורא'דיג סענסיטיוו וועגן ווערים-קאָנעס. די זעלבע חסידים שוטים וואס פארטיידיגן יעדע קארופציע פונעם רבי'ן, אריינגערעכנט דאס אז בלויז זיינע קינדער און אייניקלעך קענען שטייגן אין פאזיציעס, וועלן אננעמען מיט אמונה פשוטה דאס אז דער רבי האט מכבד געווען דעם און נישט יענעם.

אינטערעסאנט ווי יעדער פראבלעם וואס מאכט זיך אין א חסידות ווערט געלעזט מיט געבן מער כבוד, געלט און מאכט פאר'ן רבי'ן און זיין דינאסטיע. קיינמאל איז די לעזונג נישט פארקערט.

רימון האט געשריבן:כ'בין אמאל געווען ביי א רבישער חופה, וואו דער מחותן דער רבי האט גענומען פאר זיך אלע זעקס ברכות און גארנישט געגעבן פאר קיינעם. מענטשן האבן זיך זייער געוואונדערט, אזא משוגענער, א כבוד שמעקער, לאזט אלע שיינע אידן הענגען און נעמט זיך אלעס פאר זיך.
האב איך שפעטער צוריקגעהערט, אז דער מחותן איז פארנומען געווען שעות אריכות בימים החופה אויפצוקומען מיט א פלאן וויאזוי צו צעטיילן די ברכות אז יעדער זאל זיין צופרידן. נאכ'ן קומען צו דער החלטה אז ס'איז ממש נישט מעגליך צו געבן פאר יעדן און אויב גיט ער פאר אימ'ען וועט זיך יענער באליידיגן, האט ער אפגעמאכט אז ער נעמט אלעס פאר זיך און זאל מען אים בארעדן אלס א צעדרייטער.

א גוטע מעשה, אבער דארטן רעדט מען פון כיבודים פאר פרעמדע מענטשן, מחותנים, אנדערע רבי'ס וכו'. אונזער שמועס איז וועגן די אייגענע חסידים.

רימון האט געשריבן:אפילו ווען נישט, רוב חסידים האבן א בלינדע צוטרוי אין די פירערשאפט און ס'פאלט זיי נישט איין צו צווייפלען דערין. וואלטן מענטשן רעוואלטירט וואלטן די רבי'ס זיך געמוזט רעכענען דערמיט.

ממילא, אונזער פראבלעם איז נישט אז די רבי'ס נעמען זיך די מאכט, נאר אז מיר, ווי קעלבער, שענקען די מאכט בשתי ידים.

דאס איז אמת, אבער ס'נעמט נישט אוועק דעם אחריות וואס די פריצים אליין טראגן פאר זייערע כסדר'דיגע פּאַוער-גרעבּס. אויך, קלער אריין אז דאס איז סותר דיינע פריערדיגע ווערטער. אז די חסידים זענען קעלבער וועלן זיי אננעמען מיט א תמימות אלעס וואס דער רבי זאגט, נישט נאר אז זיינע אייניקלעך זאלן דאווענען ימים נוראים פאר'ן עמוד, נאר אויך אז א יונגערמאן אן עובד ה' פון א פשוט'ן שטוב וואס האט זיך פארהערט ד' חלקי שו"ע זאל פאָרדאווענען א מוסף דעם צווייטן טאג ראש השנה.
באניצער אוואטאר
העניך
שריפטשטעלער
שריפטשטעלער
 
הודעות: 807
זיך רעגיסטרירט: מאנטאג יאנואר 25, 2016 6:54 pm
האט שוין געלייקט: 949 מאל
האט שוין באקומען לייקס: 3590 מאל

הודעהדורך העניך » דינסטאג אקטאבער 19, 2021 9:26 am

מי אני האט געשריבן:מ'קען עס מצדיק זיין אז וויבאלד זיי זענען די "בני מלוכה" ווערן זיי שוין געגארט און טרענירט צו זיין מוכשר דערפאר מילדותם וממילא איז עס טאקע מער פּראבּעבּל אז זיי זאלן טאקע זיין מוכשר דערפאר (עכ"פ דאס איז די הנחה מעיקרא). מיינענדיג, אז all else being equal איז עס מער פּראבּעבּל אז ער איז מוכשר דערפאר גיווען אז ער איז א רבניש קינד ווי סתם אזוי; אזא בּעיזשיען סארט קאנדישינעל פּראבּעבּיליטי.

דאס איז א נקודה לגבי ממלאי מקום, וואס איז א באזונדערער שמועס, און דיין פוינט איז לעגיטים. הגם כ'האלט אז ס'איז בכלל נישט גענוג צו פארטיידיגן די דינאסטיעס. אבער אוודאי האט דאס נישט קיין שייכות מיט אלע אנדערע פאזיציעס, אזש געבן דעם עמוד אום ראש השנה פאר א יונגערמאנטשיק, ווען עס איז אן קיין ספק פאראן פיל בעסערע קאנדידאטן אין א חסידות פון טויזנטער אידן, צווישן זיי טאלאטפולע בעלי תפילה, יראים ושלמים, תלמידי חכמים ואנשי מעשה.
באניצער אוואטאר
העניך
שריפטשטעלער
שריפטשטעלער
 
הודעות: 807
זיך רעגיסטרירט: מאנטאג יאנואר 25, 2016 6:54 pm
האט שוין געלייקט: 949 מאל
האט שוין באקומען לייקס: 3590 מאל

הודעהדורך העניך » דינסטאג אקטאבער 19, 2021 9:39 am

קאצקע ציקער האט געשריבן:
מורינו ורבנו האט געשריבן:זעהענדיג דעם אשכול, קען איך זיך נישט איינהאלטן פון אריינרעדן, ווייל דער ענין איז דאך נוגע מיר פערזענליך.

איך קען אייך איין זאך זאגן אין קורצן: עס איז פשוט נישט מעגליך אנדערש!

נישט אומזינסט, וועט איר נישט טרעפן קיין איין קהילה בישראל, וואו עס פירט זיך אנדערש. ס'איז פשוט נישט מעגליך. ברענגט נישט קיין ראיה פון תלמידי בע"ש, ווייל דארט איז דער גאנצער מצב געווען אנדערש, ס'איז נישט געווען דומה לדומה צו די היינטיגע חסידות, און אפילו נישט צו די היינטיגע חבריות.

אין אן אנדערן געלעגנהייט וועל איך מער מאריך זיין.

אינטערסאנט אז נאכן קריג איז יא געווען מעגליך אנדערש, נישט נאר דאס נאר אמאל האט מען יא געקענט נעמען שיינע יודן און אפילו קרובים צום רבין. היינט איז עס אויסדריקלעך נאר קינדער און אייניקלעך

כ'האב שוין אמאל געשריבן אן אנאליז וועגן דעם חילוק וויאזוי רבי'ס האבן זיך אויפגעפירט נאכ'ן קריג, און וויאזוי זיי פירן זיך היינט אויף. אין קורצן, זיי פירן זיך אויף וויאזוי איינער וואס איז סעלפיש פירט זיך אויף: ווען חסידים האבן געהאט אן אפציע צו קלויבן אן אנדערן רבי'ן זענען זיי געווען ווארעם און מענטשליך, אבער היינט, ווען זיי ווייסן אז חסידות איז כמעט ווי א רעליגיע, און ס'איז קשה כקריעת ים סוף צו מאכן א טויש, פירן זיי זיך אויף ווי דיקטאטארן.

פאר דעם ענין באריכות, זע וואס כ'האב געשריבן דא:
די היינטיגע צינישע הנהגה פון חסידישע רבי'ס

כ'האב אויך אנגערירט די נקודה אין מיין ארטיקל אינעם לעצטן וועקער, א תּוֹרַת חַיִּים אויך פאר געבוירענע חסידים.
באניצער אוואטאר
העניך
שריפטשטעלער
שריפטשטעלער
 
הודעות: 807
זיך רעגיסטרירט: מאנטאג יאנואר 25, 2016 6:54 pm
האט שוין געלייקט: 949 מאל
האט שוין באקומען לייקס: 3590 מאל

הודעהדורך יעקב מעקסוועל » דינסטאג אקטאבער 19, 2021 9:38 pm

רימון האט געשריבן:נאכ'ן קומען צו דער החלטה אז ס'איז ממש נישט מעגליך צו געבן פאר יעדן און אויב גיט ער פאר אימ'ען וועט זיך יענער באליידיגן, האט ער אפגעמאכט אז ער נעמט אלעס פאר זיך און זאל מען אים בארעדן אלס א צעדרייטער.

איך בין זיכער ער האט עס געמיינט אינגאנצען לשם שמים, פשוט עס זאל נישט זיין קיין מחלוקת נעם איך אלעס פאר מיר :lol: :lol: :lol: :lol: :lol:


פון אן עוואלוציענארע פערספעקטיוו קען מען גרינג פארשטיין וויאזוי אונז זעמיר אנגעקומען צו די היינטיגע מצב פון די רבי'ס וואס נעמען איבער. ראשית, א חסידות וואו א זון נעמט איבער וועט נישט ווערן א חסידות וואס א תלמיד נעמט איבער, פארקערט קען גרינג פאסירן. די זעלבע, א חסיד וואס קומט פון א משפחה וואו עס איז איינגעפירט צו גיין צום זעלבען חסידות ווי די עלטערן, וועט נישט אזוי גרינג טוישן זיין מנהג צו גיין צו וואו ער וויל. אבער א חסיד וואז קומט פון א משפחה וואו עס איז איינגעפירט צו גיין וואו מען וויל, קען גרינגערהייט מאכן זיין מנהג צו גיין צום זעלבע חסידות ווי זיין משפחה.

מיט אזא אומבאלאנס, נעמט נישט צו לאנג זיך צו טרעפן אין א וועלט וואו רובו ככולו חסידות'ן גייען די רבי'ס און די חסידים בירושה.


דאס וואס העניך שרייבט וועגן אלע אנדערע פאסטנס, איז עס אוודאי גאר א גרויסע פראבלעם, און אויך נישט קיין חידוש. עס איז פשוט אז א טאטע טראכט זיינע קינדער און בני המשפחה זענען גאר געלונגען, און איינמאל ער איז די בעל הבית אויף די פלאץ, וועט ער טון וואס ער טראכט איז די טובה פאר זיינע קינדער, און זיין נגיעת וועט אים נישט לאזן זען וואס עס מאכט קאליע פאר די ציבור. קומען מיר צוריק צום פונדעמענטאלע פראבלעם פון די גרויסע חסידות'ן, די פראבלעם אז א יחיד איז אויסשליסלעך בעל הבית אויף א קהילה.

פארוואס זעט מען די פראבלעם ווערט מער ווי אמאל? לכאורה קומט דאס צוליב דעם וואס אמאל פלעגן רוב רבי'שע גארנישט טון מיטן טאג, ממש גארנישט. אזויווי אסאך בנשקי"ם זענען ארויף א מדריגה, זיי ווילן פילן ווי זיי טוען עפעס אויף אויף דער וועלט, דארפן אונז ליידן...
Thoroughly conscious ignorance, is the prelude to every real advance in science - James Clerk Maxwell
באניצער אוואטאר
יעקב מעקסוועל
שריפטשטעלער
שריפטשטעלער
 
הודעות: 191
זיך רעגיסטרירט: זונטאג יוני 07, 2020 12:30 pm
האט שוין געלייקט: 372 מאל
האט שוין באקומען לייקס: 516 מאל

הודעהדורך גאנצל » מיטוואך אקטאבער 20, 2021 9:34 am

העניך האט געשריבן:
גאנצל האט געשריבן:צ/ק

די קידער פארדארבן וואס ? די קהלה ? וועלכע קהלה ? די קהלה וואס ס'איז שוין אין דיינע ארטיקלען סיי ווי פרדארבן פון בעפאר

אבי צו פירקלערן בלעטער נאך בלעטער זעלבסט איינגערעדטע דברי חכמה און זיך קלאפן אויפן אייגענע רוקן אויף די אייגען איינגערעדטע דברי פקחות

יאפ, ס'איז זייער שווער צו דיעלן מיט'ן פאקט אז נישט קיין חילוק וויפיל כשרון, תורה, עבודה און יראת שמים דו זאלסט נאר האבן, וועט דיין רבינ'ס יוצא חלציו זיין פאַר דיר מיט יעדן פּאָסטן און אויפגאבע צו העלפן אידן מיט עבודת ה'.

אטאקיר גערן דעם מעסענדזשער, אויב עס מאכט דיר פילן בעסער.


מיין רבינס -האועווער ס'איז ....- קינדער, פעילט גארנישט פאר זיי. ס'איז א כבוד פאר'ן רבין פאר די קהלה אז מ'איז מכבד דעם רבינס קינדער נאטינג ראנג

איים סארי טו טעלל יו אדון העניך אבער איך שפיר נישט ווי איך קריטיקיר א מעסענזשער וויט אלל יור רעספעקט איך אטאקיר אן אטאקירער

צו אריין רעדן אין א נושא וואס דו ביסט ביי די מיינונג אז די נושא איז א אדורכגעפאלענע און א פארדארבענע, מיינט סייענטיפיש גערעדט 'זוכן נעגיטיוויטי', ווען דו האלטסט פון די עצם מין 'קהלה' און דו זאגסט דעס און דעס דארף א תקון אקעי, אבער נעגיטיוויטי נעגיטיוויטי אויף א זאך וואס ביי דיר איז איין שטיק נעגעטיוו ווייזט אויף גאר עפעס אנדערש

אין אנדערע מינינג די טויזענטער אידן (פתאים אין דיינע אויגן-מיט רעכט אפשר....) וואס זיי קוקן אן די זאך קהלה און די אופן התנהגות קהלות פאזיטיוו ביי זיי איז אקעי און מער ווי אקעי די כבוד וואס מ'געט פאר זייער רבינס קינדער

בתקוה להבנה ובמחילת כבודך
גאנצל
חבר ותיק
חבר ותיק
 
הודעות: 3056
זיך רעגיסטרירט: דאנערשטאג יולי 11, 2013 1:18 pm
האט שוין געלייקט: 501 מאל
האט שוין באקומען לייקס: 1193 מאל

הודעהדורך תרמב » זונטאג אקטאבער 24, 2021 10:46 pm

העניך האט געשריבן:
אינעם מאנומענטאלן ארטיקל "וילך שאול ואנשיו", האט זיך אין א הערה'לע (17) באהאלטן א מורא'דיגע אבזערוואציע: די דריי רבי'ס וואס האבן אויפגעשטעלט די גרעסטע קהילות נאכ'ן קריג האבן נישט פארמאגט קיין קינדער: האדמו"ר בעל בית ישראל מגור, האדמו"ר מסאטמאר, און האדמו"ר מליובאוויטש. צו דעם דארף מען צולייגן די פערט-גרעסטע קהילה, האדמו"ר מבעלזא. נישט אומזיסט האבן די פיר רבי'ס אן קיינע קינדער געהאט די גרעסטע הצלחה מיט'ן אויפבויען לגיונות של מלכות, ווייל זייער ציל איז נישט פארדאָרבן געווארן מיט'ן בויען פאר זיך און דער דינאסטיע. זיי האבן אוועקגעגעבן אלעס וואס זיי האבן געהאט פאר זייער קהילה און פאר די צילן וואס זיי האבן געהאט צו בויען די קהילה. אט אזוי זעט מען אזא הצלחה און סייעתא דשמיא.


א קליינע הערה האב איך אז דו רעכנסט אריין בעלזא, די היינטיגע בעלזא אימפעריע איז מער ווייניגער דעם היינטיגן בעלזא רב’ס קרעדיט, די פריערדיגע בעלזא רב וואס האט נישט איבערגעלאזט קיין קינדער האט נישט געבויעט קיין חסידות ס’איז געווען א מצב ארום אים כעין סקולען, דער היינטיגע רב האט געמאכט דערפון א חסידות.

אגב איך האלט אז מ’קען פארשטיין פארוואס א רבי זאל געבן פאזיציעס פאר זיינע קינדער, על פי רוב שוויצט די רבי צו שאפן געלט פאר די שולן און די מוסדות אז ער זאל מעגן ארויסנעמען א טובת הנאה פאר זיך און די קינדער, קיינער קלערט נישט (עכ’’פ כמעט קיינער) אז די רביס קינדער זענען חשובער פון די אנדערע תלמידי חכמים אבער געווענטליך נעמט מען עס אן מיט פארשטענדעניש, מ’קומט דאך נישט צו די רבי’ס צושטופטע בתי מדרשים צו הערן א שיינע דאווענען, מ’קומט דאך צו הערן דעם רבינס קרעכץ, נו די רביס קינדער קענען נאך די בעסטע קרעכצן די מערסטע ענדליך צום רבין אליינס......
תרמב
שריפטשטעלער
שריפטשטעלער
 
הודעות: 789
זיך רעגיסטרירט: מיטוואך יולי 29, 2020 9:28 am
האט שוין געלייקט: 2967 מאל
האט שוין באקומען לייקס: 835 מאל

הודעהדורך העניך » מאנטאג אקטאבער 25, 2021 11:39 pm

וואס דו זאגסט וועגן רבי אהר'לע איז נישט אינגאנצן אמת. די יסודות פון בעלז האבן זיך שוין דעמאלט אנגעפאנגען, און האבן זיך ווייטער שטערקער געבויט דורכ'ן היינטיגן רבי'ן וועלכער האט אויך נישט געהאט קיין קינדער אין די ערשטע צען יאר פון זיין ראביסטעווע.
באניצער אוואטאר
העניך
שריפטשטעלער
שריפטשטעלער
 
הודעות: 807
זיך רעגיסטרירט: מאנטאג יאנואר 25, 2016 6:54 pm
האט שוין געלייקט: 949 מאל
האט שוין באקומען לייקס: 3590 מאל

הודעהדורך שושן פורים » דינסטאג אקטאבער 26, 2021 5:20 am

גאנצל האט געשריבן:
העניך האט געשריבן:
גאנצל האט געשריבן:צ/ק

די קידער פארדארבן וואס ? די קהלה ? וועלכע קהלה ? די קהלה וואס ס'איז שוין אין דיינע ארטיקלען סיי ווי פרדארבן פון בעפאר

אבי צו פירקלערן בלעטער נאך בלעטער זעלבסט איינגערעדטע דברי חכמה און זיך קלאפן אויפן אייגענע רוקן אויף די אייגען איינגערעדטע דברי פקחות

יאפ, ס'איז זייער שווער צו דיעלן מיט'ן פאקט אז נישט קיין חילוק וויפיל כשרון, תורה, עבודה און יראת שמים דו זאלסט נאר האבן, וועט דיין רבינ'ס יוצא חלציו זיין פאַר דיר מיט יעדן פּאָסטן און אויפגאבע צו העלפן אידן מיט עבודת ה'.

אטאקיר גערן דעם מעסענדזשער, אויב עס מאכט דיר פילן בעסער.


מיין רבינס -האועווער ס'איז ....- קינדער, פעילט גארנישט פאר זיי. ס'איז א כבוד פאר'ן רבין פאר די קהלה אז מ'איז מכבד דעם רבינס קינדער נאטינג ראנג

איים סארי טו טעלל יו אדון העניך אבער איך שפיר נישט ווי איך קריטיקיר א מעסענזשער וויט אלל יור רעספעקט איך אטאקיר אן אטאקירער

צו אריין רעדן אין א נושא וואס דו ביסט ביי די מיינונג אז די נושא איז א אדורכגעפאלענע און א פארדארבענע, מיינט סייענטיפיש גערעדט 'זוכן נעגיטיוויטי', ווען דו האלטסט פון די עצם מין 'קהלה' און דו זאגסט דעס און דעס דארף א תקון אקעי, אבער נעגיטיוויטי נעגיטיוויטי אויף א זאך וואס ביי דיר איז איין שטיק נעגעטיוו ווייזט אויף גאר עפעס אנדערש

אין אנדערע מינינג די טויזענטער אידן (פתאים אין דיינע אויגן-מיט רעכט אפשר....) וואס זיי קוקן אן די זאך קהלה און די אופן התנהגות קהלות פאזיטיוו ביי זיי איז אקעי און מער ווי אקעי די כבוד וואס מ'געט פאר זייער רבינס קינדער

בתקוה להבנה ובמחילת כבודך


די פאזיטיווקייט פונעם ציבור לאלפיו ווייזט נאר ווי טיף די פראבלעם איז.

אין די גאנצע דעמאקראטישע וועלט ווייסט יעדער איינער אז ער האט די מעגליכקייט אנצוקומען צו סיי וועלכע פאזיציע, אוודאי וועט איינער דארפן שווערער ארבעטן ווי א צווייטער אבער די מעגליכקייט פארמאגט יעדער. דאס גיבט טאקע די שטופ פאר אזוי סאך מיליאנען מענטשן צו גיין ווייטער און שטייגן העכער.

אין א מקום ווי קינד און קייט ווייסט אז וויפיל ער זאל זיך נאר פלאגן, וויפיל ער זאל נאר הארעווען און זיך אויסארבעטן וועט זיין רעקארד זיין כקליפת השום פאר סיי וועלכע בנש"ק'ל וואס זאל זיך פארמעסטן פאר די זעלבע פאזיציע, און פון זיי איז דא איבער גענוג, לעסט טיים איי טשעקט איז געבורט קאנטראל נישט צו פאפולער אין די באבעקיטשטע היימען. העכסטנס וועט מען איהם צוטיילן א מוצ'ל פאזיציע אין א בעיסמענט שטיבל אין די נייע געגנט, אויך נאר ביז די שוהל ווערט פאפולער, ביי די חנוכת הבית צומאל גאר ביי די אבן הפינה איז עס נשתלב מיט די מעמד הכתרה פונעם דריי און צוואנציגן קוים באבערדלטן נכדו חביבו וואס האט נארוואס לעמינעיטעד זיין 'יורה יורה' ביי די קארנער קאפי סטאר אויף זיין בלאק.

מיט אזא שוואכע צוקונפט פארן פשוטן אינדעווידואל, איז דאס נישט קיין חורבן? לייגט עס נישט צוגרינד דורות פון אויסגעלאשענע טאלאנטן וואס וואלטן ווען געקענט בליען אין אזוי סאך הינזיכטן?!

אויב דאס הייסט נישט "פארדארבן די קהילות הקודש", דאן זאג מיר מיין פריינט, וואס הייסט יא??
דער חסיד פארן מאדערן ארטאדאקס איז פונקט ווי דער לב טהור פארן חסיד ודו'ק
באניצער אוואטאר
שושן פורים
ידיד ותיק
ידיד ותיק
 
הודעות: 759
זיך רעגיסטרירט: מאנטאג יולי 08, 2013 12:11 am
האט שוין געלייקט: 549 מאל
האט שוין באקומען לייקס: 981 מאל

הודעהדורך berlbalaguleh » דינסטאג אקטאבער 26, 2021 8:30 am

שושן פורים: אונז האמיר זיך שוין א לאנגע צייט נישט ארומגעריסן. ווייל דו שרייבסט נישט גענוג אפט. ביטע טו תשובה. לכבוד דעם נייעם יאר. שוין. לעניינינו. עס זענען דא בליעה"ר א סאך בנשק"לעך וועלכע יאווען זיך אויף בכבוד'יגע פאזיציעס. נאר איך פארגין זיי עס. כן ירבו. ווייל זיי נעמען גארנישט אוועק פון מיר.

איך קען דיר אויפווייזן אז אויב איינער האט די קוואליפיקאציעס צו זיין א מו"ץ אין סיי וועלכע קהילה, וועט איהם קיינער נישט שטיין אין וועג פון הצלחה. איך ווילל נישט אויסרעכענען קיין נעמען. אבער אויב דו וועסט גוט קוקן וועסטו באמערקן אז א גרויסער טייל פון די מערסט בארימטע דיינים ופוסקים שטאמען נישט פון רעבישע משפחות. נייערט פון בעלי בת'ישע...!
באניצער אוואטאר
berlbalaguleh
שריפטשטעלער
שריפטשטעלער
 
הודעות: 15857
זיך רעגיסטרירט: דינסטאג יולי 17, 2012 12:57 pm
האט שוין געלייקט: 18504 מאל
האט שוין באקומען לייקס: 10559 מאל

נעקסט

גיי צוריק בחצרות הקודש

ווער איז יעצט דא?

באניצער וואס לייענען דעם פארום: נישטא קיין אנליין באניצער און איין גאסט